Recent Posts

Breaking News

‘White lady’ miapil sa groufie


“Dili nindot nga magpahulagway ang tulo ka buok kay dunay di maayong mahitabo,” sigon pa sa tinuohan sa katiguwangan.

Kini nahitabo sa tulo ka mga maintenance personnel nga nag-groufie, apan dunay usa ka babaye nga puti nga gituohang niapil kanila.

Nahitabo kini niadtong miaging semana sa alas 6 sa buntag sa ikaduhang andana sa Mandaue City Multi-Purpose building diin naa ang pipila ka mga departamento sa gobyerno sa dakbayan nahimutang.

Bag-o pang abot sa building sila si Angie Javines ug Myrna Perez niadtong orasa, sa wala pa sila nagsugod og duty, nag groufie una sila kuyog sa usa ka gwardya nga ila usab nga higala.

Gi-post dayon ni Perez sa Facebook ang hulagway ug didto na nanlimbawot ang iyang balhibo dihang ang iyang usa ka higala mikomento nga adunay niapil nga babaye sa ilang likod.

Matod ni Javines nga imposible nga tawo kadto tungod kay ang maong opisina diin didto nagbarog ang babaye, sirado ug wala pay mga empleyado.

Tungod sa iyang kakulba, nilitok og mga pag-ampo si Javines ug Perez pahinungod sa maong panghitabo.

MGA KAHIBULONGAN

Nipaambit sab si Javines nga di kadto ang unang higayon nga aduna silay kasinatiang makahadlok sa maong dapit.

Gani, nakasuway pa si Javines niadto nga sa kasilyas sa panglalake sa maong building aduna siyay nakita nga usa ka lama sa tiil nga dako pa sa tiil sa tawo ug duha lang ang kumagko.

Aduna say higayon nga basta manglimpyo sila, ilamba ang mga pultahan sa mga kasilyas.

Si Perez sab mipaambit sa iyang kasinatian sa Superbalita Cebu.

Usa ka higayon nga samtang naglingkod siya sa gawas sa kasilyas diin nahiluna ang ilang lamisa sa mga maintenance, nakatagpilaw siya, apan nahigmata siya dihang iyang namatngunan nga adunay nidagan nga bata paingon sa kasilyas

Sigon niya nga iya kining gisundan, apan wala siyay nakitang tawo nga anaa sa CR, apan adunay mga hugaw sa masuso nga nagpat-ak sa sawog.

Dugang ni Perez nga kada buntag na sila mag-estoryahanay sa mga hilaga nila nga gwardya sa building. Matod nila nga matag gabii aduna gyuy maghilak nga babaye sa ikaduhang andana duol sa kasilyas.

Tungod sa ilang kasinatian nga makahahadlok kaniadto, matod ni Javines nga mananghid na gyud sila pinaagi sa pagtoktok sa kada cubicle sa kasilyas ug manabi sila samtang naglimpyo.

“Among ingnon kada buntag nga ‘di mi manghilabot, igo ra mi manglimpyo.’ Human ana di na sila manghilabot,” sigon ni Javines.

Di man ipakita nilang Javines ug Perez sa ubang departamento, apan mahadlok gyud sila sa maong lugar tungod sa ilang nasinati.

Gani sigon ni Javines nga mao kini hinungdan nga magsugod sila og duty alas 6 sa buntag aron dali silang mahuman sa ilang duty ug makauli dayon tungod kay matag hapon sagad magparamdam.

Sa laing bahin, sigon ni Msgr. Joseph Tan, spokesperson sa Archdiocese sa Sugbo, nga ang Katolikong simbahan mutuo gyud nga ang mga espirito anaa ra sa atong palibot.

Dugang niya nga kana nga mipakita sila, nangayo lang kini og pag-ampo alang kanila. (KFD)


Source: Sun.Star Superbalita (https://www.sunstar.com.ph/article/1875343/Superbalita-Cebu/Balita/White-lady-miapil-sa-groufie?ref=rss&format=simple&link=link)

No comments