Recent Posts

Breaking News

Wa nay pasyente sa Covid sa Don Vicente Rama High School


GIPAHIBAWO ni Konsehal Joel Garganera, deputy chief implementer sa Cebu City Emergency Operations Center (ECO), nga wa nay asymptomatic Covid-19 patients nga gipahiluna sa Cebu City Government sa Don Vicente Rama Memorial National High School.

Ang konsehal nagkanayon nga ang mga pasyenteng nagpaalim sa coronavirus disease anaa gipahiluna sa New Normal Oasis for Adaptation and a Home (Noah) Complex sa South Road Properties (SRP).

Giluwatan kini ni Garganera isip reaksyon sa pamulong ni Raul Constantino, presidente sa Teachers’ Dignity Coalition Central Visayas, nga ni-post sa Facebook ug nag-awhag sa City Government nga di pabutangan ang maong eskwelahan og ga- Covid positive sanglit gigamit na ang tunghaan.

“Sir, with due respect, if your team is very serious on curbing the spread of Covid-19, why you have allowed such an ironic, and very appalling scenario to happen in Don Vicente Rama Memorial National High School?“ matod ni Constantino sa iyang Facebook post.

Si Garganera nipadayag nga ang naa sa maong eskwelahan mao ang mga pulis nga nagbantay sa mga checkpoint sa siyudad.

“Let us remind our teachers/schools and parents association to be kind and understanding to our PNP. They took care of us from contact tracing, manning our borders and checkpoints, enforcement of health protocols even during the height of the pandemic that cost them 4 PNP officers died of Covid,” matod ni Garganera.Sukad nga miminos og maayo ang mga kaso sa Covid sa Dakbayan sa Sugbo, ang mga tunghaan nga gigamit nga isolation centers gipamiyaan na.

Sa nakalabay nga mga adlaw, nisakag balik ang mga kaso, apan nihinay na sab ning bag-ohay lang.

Si Garganera nipasalig nga paspas ang Siyudad sa iyang contact tracings, nga bisan gani second generation contacts ilang giapil sa swab testing aron seguradong di makakatap ang mananakod kaayong sakit. (PAC)


Source: Sun.Star Superbalita (https://www.sunstar.com.ph/article/1877299/Superbalita-Cebu/Balita/Wa-nay-pasyente-sa-Covid-sa-Don-Vicente-Rama-High-School?ref=rss&format=simple&link=link)

No comments