Recent Posts

Breaking News

Tindahan nag grand opening, gisirhan


Usa ka oras kapin human niabli ang usa ka bag-ong baligyaanan og sapatos nga nahimutang sa Sanson Road, Barangay Lahug, Cebu City, gipasirad-an kini sa Siyudad tungod sa daghang tawo nga ning-adto sa lugar aron mopahimus sa ilang sale.

Tungod niini, wa na natuman ang health protocol.

Nagpahigayon og super sale ang JS Footwear atol sa ilang grand opening day sa Nobiyembre 11, 2020 kon diin tulo ka paresan sa sapatos ang mapalit sa presyo nga P998 lang.

Nangabli ang shoe center untop alas 9 sa buntag, apan gipasirad-an kini pag-serve sa show cause order mga alas 10:30 sa buntag. Ang management sa shoe center nitug-an kang Lahug Barangay Captain Hazel Ann Empleo nga wa sila magdahom nga ingon-ato kadaghan ang mga tawo nga nangadto sa ilang grand opening day.

Mao sab kini ang ilang girason sa mga personnel sa City Hall nga ni-serve sa show cause order, matod ni City Disaster Risk Reduction and Management Office (CDRRMO) officer-in-charge Ramil Ayuman, kinsa niuban sa pag-serve sa show cause order.

“Gi-check jod nato ang site gahapon (on Nov. 10). Naka-prepare sad gyud baya sila. Wa lang jod sila ga-expect nga ingon ato kadaghan,” matod ni Empleo.

Atol sa inspeksyon niadtong Nobiyembre 10, niingon si Empleo nga adunay gigahin ang management nga mga markers ug waiting area para sa mga mamalitay aron masiguro nga mapatuman ang health protocol.

Mga alas 5:00 pa lang sa buntag sa Miyerkules, aduna nay mga tawo nga gahuwat gawas sa tindahan.

Ang management modawat lang unta og 150 ka customers matag adlaw para masiguro nga mapatuman ang social distancing sud sa baligyaanan.

Alas 10:00 sa buntag, usa ka oras sukad nag-abli ang tindahan, naabot ang mga personnel sa Cebu City Police Office (CCPO) para pagpahawa sa mga tawo sa lugar.

Alas 10:30 sa buntag, naabot ang mga personnel sa Business Permits and Licensing Office (BPLO) para pag-serve sa show cause order ug pagpasirado sa establisemento.

WAY BUSINESS PERMIT

Ang pangu sa BPLO Jared Limquiaco niingon nga gihatagan nila og 72 ka oras ang management sa JS Footwear para mosumiter pagpasabot sa hitabo.

Kon dili igo ang rason sa management, dili isyuhan sa BPLO og business permit ang baligyaanan, matod ni Limquiaco.

Si Limquiaco nibutyag nga wala pa’y business permit ang maong tindahan, igo pa lang nakabayad og assessment sheet nga usa sa mga kinahanglanon para makakuha og business permit.

Niisyu sab ang Department of Trade and Industry (DTI) og notice of violation sa JS Footwear para sa posibleng kalapasan sa sales promo guideline.

Giklaro sab sa DTI nga ang certificate of business name registration di usa ka lisensya “to operate and engage in business” ug kinahanglan pa sila mokuha og mayor’s business permit.

Si Cebu City Councilor Joel Garganera, Emergency Operations Center (EOC) deputy chief implementer, niingon nga kinahanglan sab nga manubag sa tag-iya sa baligyaanan kon musaka og kalit ang kaso sa coronavirus disease 2019 (Covid-19) sa mga umaabot nga adlaw ug mamatud-an nga ang common source sa pagpanakod mao ang lugar, dunay tulibagon ang management.

“Sa umaabot nga mga adlaw, if we will have a sudden rise of cases and the common ground that they have, in one way or another, visited the area, the perimeter of that store, then we will file appropriate action to the said establishment,” matod ni Garganera.

Gipahinumduman ni Garganera ang publiko sa pagtuman gihapon sa health protocol ug ang safety unta ang unahon.

Si Mayor Edgardo Labella mipahinumdom sad nga ang ekonomiya sa dakbayan naghinay-hinay pa sa pagbangon ug ang insidente usa posibleng rason nga mamahimong mapahimutang na sad ang dakbayan ubos sa enhanced community quarantine (ECQ) kon mosakag balik ang mga kaso.

Gipahinumduman ni Labella ang publiko nga aduna pay hulga sa Covid-19. Alas 5:30 sa hapon, pito ka oras sukad kini nanirado, ang JS Footwear nag-post sa ilang Facebook page nga “everything is under control.”

“Everything is under control. Together with the barangay officials of Barangay Lahug, rest assured, we will bounce back,” segun sa JS Footware pinaagi sa ilang Facebook page.

Matod sad nila nga “no one can drag us down to our mission” mao ang pag-provide og “affordable and quality shoes to our fellowmen.”


Source: Sun.Star Superbalita (https://www.sunstar.com.ph/article/1876578/Superbalita-Cebu/Balita/Tindahan-nag-grand-opening-gisirhan?ref=rss&format=simple&link=link)

No comments