Recent Posts

Breaking News

Terorista mobalos kay napatay ilang lider?


ANAA karon sa heightened alert status ang militar ug kapulisan sa Central Mindanao sa posibleng panimalos sa mga terorista sa kamatayon sa ilang lider niadtong miaging adlaw.

Gibutyag ni 6th Infantry (Kampilan) Division Chief ug Joint Task Force Central Commander Major General Juvymax Uy nga adlaw-gabii hugtanon silang nagbantay sa planong pagpamomba sa mga terorista.

Kahinumdoman nga unom ka mga sakop sa Dawlah Islamiyah-Ansar Khilafa Philippines-Maguid Remnants terror group ang napatay sa gilusad nga law enforcement operation sa mga sundalo ug pulis sa Purok 6, Barangay Koronadal Proper, Polomolok, South Cotabato.

Itunol na unta sa hiniusang puwersa sa 5th Special Forces Battalion, 4th Special Battalion, 6th Infantry Division ug Philippine National Police-Special Action Force ang warrant of arrest batok kang Arafat Bulacon alyas Kumander Mula, apan nanukol ang mga suspek sa raiding team hinungdan nga sila napatay.

Sumala kang Uy nga si Mula maoy lider karon sa Dawlah Islamiyah terrorist group sa diha nga napatay ang ilang kanhing lider nga si Geoffrey Nilong.

Narekober gikan sa mga suspek nga napatay ang usa ka 5.56 M4 rifle, duha ka 12-gauge shotgun, duha ka caliber .38 revolver, usa ka 5.56 pistol, usa ka improvised explosive device ug usa ka Isis flag.

Ang grupo ni Bulacon gitumbok nga nalambigit sa pagpamomba sa General Santos City, robbery, extortion ug pagpatay sa mga pulis sa Polomolok.

Sa kasamtangan, gihingusgan pa sa mga awtoridad ang pagbantay sa mga dapit nga posibleng target bombahan sa mga terorista isip panimalos sa kamatayon ni Kumander Mula.


Source: Sun.Star Superbalita (https://www.sunstar.com.ph/article/1876909/Superbalita-Davao/Balita/Terorista-mobalos-kay-napatay-ilang-lider?ref=rss&format=simple&link=link)

No comments