Recent Posts

Breaking News

Speaker Velasco 'caretaker’ sa distrito ni Raul Del Mar?


USA ka magbabalaod gusto nga si House Speaker Lord Allan Velasco maoy mahimong caretaker congressman o mohulip ni Kongresista Raul Del Mar sa North District sa dakbayan sa Sugbo aron mapadayon ang mga programa ug proyekto niini.

Si Kongresista Rodrigo “Bebot” Abellanosa sa south district sa Dakbayan sa Sugbo nagkanayon nga si Velasco ang labing haom nga moasumir sa pwesto sanglit suod sa House Speaker ang pamilyang Del Mar ug makabenepisyo niini ang taga north district.

Si Abellanosa nipadayag usab sa iyang kaandam kon ugaling ipadala og laing kongresista ni Velasco uban sa pagpadayag nga isip usa ka loyal soldier, andam niya kining buhaton.

Gipasabot ni Abellanosa nga sila ni Del Mar, usa sa mga nibarog didto sa Kongreso para mapatuman ug maangkon ni Velasco ang pangpangulo sa House of Representatives hulip ni kanhi Speaker Alan Peter Cayetano.

Matod ni Abellanosa nga matag barog niya para pagdiskurso didto sa sa hawanan sa House of Representatives tibuok Cebu City ang iyang gidala sanglit duha ra kini ka distrito labi na dihang gituki ang General Appropriations Act (GAA) diin gamay ra og budget para sa imprastraktura ang siyudad nga unta benenilyon ang gi-remit niini ngadto sa nasyonal ug dagko pa og budget ang ubang probinsya mga gamay og gi-remit ngadto nasudnong panudlanan.

Si Atty. Marchel Sarno, election officer sa Commission on Election sa North District nagkanayon nga mahimong makapahigayon og special election sa north district apan magkinahanglan kini og dako nga pundo.

Dason niya, usa ka tuig sa dili pa ang regular election apan ang paspas o dali mao ang pagtudlo og caretaker congressman para sa maong diistrito diin ang House Speaker maoy mopirma sa appointment ngadto sa kasamtangang magbabalaod. (PAC)


Source: Sun.Star Superbalita (https://www.sunstar.com.ph/article/1877293/Superbalita-Cebu/Balita/Speaker-Velasco-caretaker-sa-distrito-ni-Raul-Del-Mar?ref=rss&format=simple&link=link)

No comments