Recent Posts

Breaking News

Sayo, andamang ID, COE, Q pass


USA ka ba sa mga natanggong sa trapiko sa pagsulod sa Cebu City sa Lunes sa buntag, Nobiyembre 16?

Mao na kini ang normal sa umaabot nga mga adlaw sukad gisugdan pagbalik og hugot sa Siyudad sa Sugbo ang border control human mosulbong og kalit ang mga kaso sa coronavirus disease (Covid-19) niadtong Sabado, Nobiyembre 14.

Busa, tambag ni Jonathan Tumulak, pangu sa City of Talisay-Traffic Operations and Development Authority (CT-TODA), batasana na ang pagsayo sa pagkatug, pagmata ug paglakaw.

Labing minos usa ka oras sa imong naandan nga pagbiya sa balay aron di ka mapiit sa trapiko.

Base sa obserbasyon ni Tumulak nga mga tulo ka oras ang paghuot sa trapiko, kay gikan sa alas 7 sa buntag, sa dayon nang alas 11 sa buntag ang pagluag.

Sa Barangay Bulacao nga nag-utlan sa tali sa mga siyudad sa Sugbo ug Talisay, gihugtan ang border control human momando si Mayor Edgardo Labella dihang nasayod sa 59 ka bag-ong mga kaso sa Covid nga natala niadtong Sabado.

ANDAMA ANG ID, COE

Gawas sa pagsayo, nitambag usab si Tumulak sa publiko sa pag-andam kanunay sa ilang mga identification (ID) cards, certificate of employment (COE) ug quarantine pass sa di mga authorized person outside residence (Apor) alang sa border control.

“Usa sa akong nabantayan nga nakahatag og langan katong mga moagi sa border nga dinha pa lang usab sila mangita sa ilang Q pass, ID ug COE.Mas maayo iandam daan nila,” tambag ni Tumulak.

Tungod sa nagkahuot nga trapiko, nihimo og lakang sila si Tumulak aron maluagan ang lumbay sa mga sakyanan.

Ilang gipaagi ang uban sa Cebu South Coastal Road (CSCR) kay di pa daghan ang mga sakyanan.

Nigamit sila og megaphone sa pagpahibawo sa mga motorista alang sa pagliko padung sa CSCR.

Sa padung sa habagatan, sa lungsod sa Minglanilla, naghuot usab kay usa ra ka bahin sa highway ang maagian kay ang pikas bahin giayo.

LAPU-LAPU

Ang mosulod sa dakbayan sa Lapu-Lapu subay sa duha ka taytayan, gipahugtan ang checkpoints hinungdan nga adunay pagkahuot sa dagan sa trapiko.

Gisugdan sa Lunes, Nobiyembre 16, ang pagsira sa viaduct ug U-turn slot sa Marcelo Fernan Bridge aron ang tanang sakyanan nga gikan sa Mandaue City molahos sa Barangay Pusok diin sa tiilan nga bahin adunay checkpoints sa kapulisan.

Samtang sa unang taytayan adunay random checkpoints aron pagsusi sa matag motorista o pasahero kon aduna silay travel pass ug quarantine pass, pahibalo ni Mario Napule, hepe sa City Traffic Management System (CTMS) sa Dakbayan sa Lapu-Lapu.

Dugang pa ni Napule nga ang maong checkpoint palugakan sa atol sa peak hours aron dili mograbe ang bul-og sa sakyanan nga matanggong. (Dugang taho ni FVQ)


Source: Sun.Star Superbalita (https://www.sunstar.com.ph/article/1877065/Superbalita-Cebu/Balita/Sayo-andamang-ID-COE-Q-pass?ref=rss&format=simple&link=link)

No comments