Recent Posts

Breaking News

Regular, casual employees sa Cebu City nakadawat sa 14th month pay


Gi-release na sa Cebu City Government ang 14th month pay sa ilang kapin 5,000 ka mga regular ug casual nga kawani.

Kini human nimando si Mayor Edgardo Labella ngadto sa City Treasurer’s Office (CTO) niadtong Lunes pag-andam sa mga dokumento para mahatag ngadto sa mga empleyado ang 14th month pay aron aduna silay magamit labi na niining nagsingabot nga buwan sa Disyembre.

Si Noel Wenceslao, Officer In-Charge (OIC) sa CTO, nagkanayon nga 80% na sa mga kawani ang nahatagan sa ilang 14th month pay ug karong adlwa, Nobiyembre 19, magpadayon sila sa paghatag aron makumpleto na ang pag-release sa maong suweldo ngadto sa mga empleyado balor og usa ka buwan nga sweldohan.

Si Wenceslao nagkanayon nga gi-release sa City Hall ang 14th month pay nga makonsiderar nga Christmas bonus aron pagsunod sa Department of Budget and Management (DBM) circular Number 2016-4 nga nagmando sa paghatag sugod Nobiyembre 15 matag tuig.

Ubos usab sa maong circular sa DBM, ipahatag usab ang cash gift balor og P5,000 ngadto sa mga empleyado.sa gobyerno.

Ang City Treasurer’s Office nihatag sa 13th month pay ngadto sa samang mga empleyado niadtong buwan sa Hunyo subay sa Presidential Decree 851.

Si Wenceslao wala pa masayod kon anaa bay laing Christmas bonus nga ihatag ang City Government sama sa nadawat sa mga kawani sa miaging tuig sanglit wala pay kamanduan si Labella. / PAC


Source: Sun.Star Superbalita (https://www.sunstar.com.ph/article/1877435/Superbalita-Cebu/Balita/Regular-casual-employees-sa-Cebu-City-nakadawat-sa-14th-month-pay?ref=rss&format=simple&link=link)

No comments