Recent Posts

Breaking News

Proyektong pang-infra sa Davao City gihan-ay na


USA sa mga gihatagan og dakong pagtagad sa lokal nga panggamhanan sa Davao City, taliwala sa nasinating pandemya sa Covid-19, mao ang mga proyektong inprastraktura.

Kini maoy giyagyag ni Mayor Sara Duterte-Carpio atol sa iyang hamubo nga State of the City Address (Soca) Lunes sa hapon, Nobyembre 16, 2020.

Sumala ni Duterte-Carpio nga ang City Economic Enterprises Office (CEEO) duna nay pundo alang sa pagpalit og mga propedad aron nga mag-establisar og mga sementeryo sa amihanan ug habagatan nga bahin sa dakbayan sa Davao, apil na niini ang pag-develop sa Tagakpan Cemetery.

Samtang magsugod na ang pag-ayo sa mga pampubliko nga palengke sa Toril, Mintal ug Bankerohan, ilabi na ang hingpit nga paghuman sa Agdao Public Market.

Sa pikas bahin, duna nay hataas nga plano sa pag-develop og local government center sa may San Pedro Street ning siyudad ug ang prayoridad mao ang pagpalapad sa bakanteng mga luna sa may Rizal Park ug tukuran og underground parking area.

Kabahin lang kini sa daghan pang mga proyekto nga nakahan-ay sa lokal nga panggamhanan nga sa di madugay maangkon na sa siyudad alang sa kaayohan sa mga Dabawenyos. (WGM)


Source: Sun.Star Superbalita (https://www.sunstar.com.ph/article/1877026/Superbalita-Davao/Balita/Proyektong-pang-infra-sa-Davao-City-gihan-ay-na?ref=rss&format=simple&link=link)

No comments