Recent Posts

Breaking News

PhilHealth 8 mipasalig sa tarong nga serbisyo


ORMOC CITY, Leyte - Taliwa sa mga kontrobersiya nga giatubang karon sa Philippine Health Insurance Corporation (PhilHealth), gipasalig gihapon sa ahensya nga magpabilin ang ilang tinud-anay nga serbisyo sa katawhan.

Sa gihimo nga press conference sa Philhealth Ormoc Office, gihangyo ni Philhealth Region 8 Vice President Dr. Rosario Suyom ang publiko nga dili hukman dayon ang tanan nga mga kawani sa ahensya.

“Sana bigyan naman kami ng due process bago sabihin na hindi kami bigyan ng pundo kasi paano naman kami makapagbigay ng serbisyo sa tao kung wala naman kaming pundo,” matod ni Suyom.

Giangkon ni Suyom nga dako og epekto sa ilang panarbaho ang kontrobersiya sa mga tag-as nga opisyal apan di kini makapugong kanila sa paghatud og tinud-anay nga serbisyo.

Base sa datos, dako og porsiyento sa Philhealth members ang mga poorest of the poor ug gisundan kini sa government contributions.

Sa Eastern Visayas, ang Philhealth dunay 4,789,000 nga miyembro diin lapas na kini sa 100 porsiyento sa populasyon.

Gipasigarbo usab ni Suyom ang ilang package benefits alang sa coronavirus disease 2019 (Covid-19).

Nag-una niini ang ilang Community Isolation Package, lakip na niini ang health education, medical attention ug medisina.

Dapat naka-isolate ang pasyente sa usa ka isolation facility, ang facility maoy mo-file og claim 60 ka adlaw gikan sa pag-discharge. Kapin sa P20 mil ang madawat nga benepisyo sa pasyente.

Tungod sa kahasol gumikan sa Covid-19, nihimo usab og inisyatiba ang Philhealth alang niadtong mag-update sa ilang impormasyon.

Matod ni Suyom, kon ang pasyente na-admit, mamahimo nga ang hospital na ang mo-process niini. Kon gusto sa miyembro nga mag-update, mamahimo nga mag-send ra sa ilang email address o kaha sa ilang Facebook page.

Gitug-an ni Suyom nga wala sila’y partnership sa Red Cross sa Eastern Visayas sa pagpahigayon og Covid-19 test.

“Wala po tayong accredited na PRC testing dito sa Eastern Visayas,” pasabot ni Suyo. (JKDP)


Source: Sun.Star Superbalita (https://www.sunstar.com.ph/article/1876976/Superbalita-Cebu/Balita/PhilHealth-8-mipasalig-sa-tarong-nga-serbisyo?ref=rss&format=simple&link=link)

No comments