Recent Posts

Breaking News

Pangayaw, gikabalak-an sa pagpusil sa IPMR


NABALAKA karon ang mga residente sa Purok 6, Sitio Makabulos, Barangay San Miguel sa Magsaysay, Davao del Sur nga mahitabo ang "Pangayaw" human gipusil-patay ang usa ka Indigenous People’s Mandatory Representative (IPMR) sa lugar, alas 7:30 sa gabii, Biyernes, Nobyembre 13, 2020.

Sa gipaguwang taho sa Magsaysay Municipal Police Station, nasayran nga ang biktima mao si David Saling, hamtong nga molupyo sa lugar.

Si Police Major Jeffmar Tercero, hepe sa kapolisan, nagbutyag sa ilang imbestigasyon, nga nagpahulay lamang ang biktima sulod sa ilang balay kauban ang iyang kapuyo dihang kalit miabot ang usa ka lalaking suspek.

Matod ni Tercero nga anaa sa kuwarto ang biktima dihang milili pa ang suspek una nagpaboto sa iyang wa pa matinong kalibre sa armas ug naigo kini sa tiyan.

Miresponde ang mga kabanay sa biktima diin gidala dayon kini sa duol nga tambalanan apan nakabsan sa hinulamang kinabuhi.

Gimando na ni Tercero ang lawom nga imbestigasyon sa dugoong krimen hayan madakpan ang maong suspek ug matugkad ang motibo sa krimen.

Sa kasamtangan, gihaya na sa Brillantes Funeral Homes sa silingang lungsod sa Bansalan, Davao del Sur ang patay’ng lawas sa biktima.

Sa insidente, nabalaka ang ubang molupyo sa lugar nga mahitabo ang Pangayaw (tribal war) human napatay ang ilang opisyal. (Orlando B. Dinoy)


Source: Sun.Star Superbalita (https://www.sunstar.com.ph/article/1876906/Superbalita-Davao/Balita/Pangayaw-gikabalak-an-sa-pagpusil-sa-IPMR?ref=rss&format=simple&link=link)

No comments