Recent Posts

Breaking News

Pagpatay sa airport police duna nay person of interest


DUNA nay person of interest ang kapulisan sa Dakbayan sa Carcar sa pagpatay kang Mactan Cebu International Airport Police Jovani Dayangco.

Si Dayangco nga nanilhig sa tugkaran sa ilang balay sa Sityo Bonbon, Barangay Ocaña, Dakbayan sa Carcar gipusil-patay mga alas 4:30 sa hapon sa Biyernes, Nobiyembre 13, 2020.

Si Police Lieutenant Colonel Allan Rosario, hepe sa Carcar Police Station, nga nahinabi sa Superbalita Cebu, niingon nga sa ilang imbestigasyon, ilang nasayran nga si Dayangco dunay gikalalis niadtong Dominggo, Nobiyembre 8.

Kini kabahin sa iyang sakyanan nga gi-park.

Ila pang kuhaon ang kopya sa close circuit television (CCTV) camera footage sa eskina sa Ocaña kon duna bay kuha sa mga gunman.

Ila usab nga kuhaon ang background sa pagkatawo ni Dayangco alang sa dugang pang imbestigasyon.

Si Dayangco daling gidala sa iyang banay sa Carcar Provincial Hospital, apan gideklarar nga dead on arrival sa mga doktor.

Matod ni Rosario nga bag-o lang nauli gikan sa trabaho si Dayangco ug nanilhig sa tugkaran dihang niabot ang riding in tandem.

Ang angkas maoy nipusil kang Dayangco sa makadaghan. (GPL)


Source: Sun.Star Superbalita (https://www.sunstar.com.ph/article/1876788/Superbalita-Cebu/Balita/Pagpatay-sa-airport-police-duna-nay-person-of-interest?ref=rss&format=simple&link=link)

No comments