Recent Posts

Breaking News

Pag-resign ni Alvarez usa ka maayong plano?


USA sa mga gituohang hinungdan sa pipila ka mga opisyales ning probinsya sa pag-resign ni Former Speaker ug Davao Del Norte, First District Representative Pantaleon Alvarez mao ang usa ka lakang sa pagpangandam sa 2022 Elections.

Kini ang gibutyag ni Purok Chairman Joverto Tangcogo sa Purok 13, Barangay San Miguel, Siyudad sa Tagum nga nahinabi sa Superbalita nga, sumala pa niya, ang lakang nga gihimo ni Alvarez usa sa pagpangandam.

Dako sab ang pagtuo ni Tangcogo nga dili makaapekto sa Partido Demokratiko Pilipino–Lakas ng Bayan (PDP-Laban) ang pag-resign ni Alvarez, sanglit sumala pa niya nga dugay nang nahimong hungihong sa probinsya ang pag-resign sa opisyal.

Ang yanong lungsuranon nga nagpatago sa pangalang Angie maoy pagtuo nga si Alvarez dili gyod kaalyado sa administrasyong Duterte sanglit, sumala niya ang mga politiko labaw pa sa mga artista, kaalyado karon apan pagkaugma o sunod adlaw kalaban na.

Samtang ang kanhi Public Information Officer ning probinsya nga si Pat Lucero Pacquiao nagsulti sab nga ning kasamtangan ang kalaban ni Alvarez mao si Presidente Duterte mismo ug ang tanan nga alyados sa pangulo.

Maoy pagtuo ni Pacquiao nga dili makahugno kang Alvarez ang lakang nga gihimo sa higayon nga mukuyog kaniya ang iyang kanhi mga kauban sa partido sanglit, sumala pa ni Pacquiao nga sa lokal nga politika dili kaayo bug-at ang partido kundili ang panag-uban sa mga politiko ilabi na sa pangampanya.

Miguwa ang maong mga hisgutanan human nga si Alvarez nagpahibalo Doninggo, Nobyembre 15, 2020, sa iyang “irrevocable resignation” sa pagka secretary-general sa PDP-Laban kini human sa lima ka tuig niya nga pagpahisakop sa maong partido.

Si Alvarez sumala pa, mibalhin sa partido ni kanhi Defense Secretary Renato De Villa nga Reforma Party diin siya mamahimong chairman ug maoy mobuhi pag-usab sa maong partido. (Dexter T. Visitacion)


Source: Sun.Star Superbalita (https://www.sunstar.com.ph/article/1877029/Superbalita-Davao/Balita/Pag-resign-ni-Alvarez-usa-ka-maayong-plano?ref=rss&format=simple&link=link)

No comments