Recent Posts

Breaking News

P1M drugs gikan sa ‘shabu baggage counter’ pusher nasakmit


Giisip nga “baggage counter” staff sa shabu ang usa ka 34 anyos nga babayeng nadakpan sa buy-bust sa Huwebes sa gabii, Nobiyembre 19, 2020 sa dan Tres de Abril, Barangay San Nicolas, Dakbayan sa Sugbo.

Ang suspek nga nasikop nila ni Police Major Eduard Sanchez, hepe sa Sawang Calero Police Station, mao si Mary Joy Maranga, 34, taga Belgium st., Barangay Suba, Dakbayan sa Sugbo.

Nasakmit gikan kang Maranga ang shabu nga motimbang og 150 gramos nga dunay Dangerous Drugs Board (DDB) value nga P1 million.

Matod ni Sanchez sa interbyu sa Superbalita Cebu nga si Maranga masusamag staff sa baggage counter kay siya ang binlan sa shabu sa iyang mga amo. Giisip siya nga high value individual.

Si Maranga gibilanggo sa Sawang Calero Police Station samtang gipaabot ang pagpasak og kaso.

Mason pud

Duha ka mga mason nga kanhi construction workers nadakpan usab sa mga operatiba sa Regional Drug Enforcement Unit (RDEU)-7 ug Regional Intelligence Division (RID)-7, sa buy-bust sa Sityo Mabugnaw, Barangay Camputhaw ning siyudad

Ang mga nasikop mao sila si Mike Palconet, 30, lumolupyo sa Sityo LPC, ug Alfonso Labra, 19, taga Sityo Mabugnaw.

Mokabat sa 55 gramos ang gituohangshabu nga nasakmit gikan sa duha nga dunay DDB value nga P374, 000.

Ang duha niingon nga tungod kay gipang pul-an na sila sa pagsige og estambay kay wa pa sila katrabaho, sila nag sideline una sa illegal drugs.

Ang tulo pasakaan og kasong paglapas sa Republic Act 9165 kun Comprehensive Dangerous Drugs Act of 2002. (BBT)


Source: Sun.Star Superbalita (https://www.sunstar.com.ph/article/1877451/Superbalita-Cebu/Balita/P1M-drugs-gikan-sa-shabu-baggage-counter-pusher-nasakmit?ref=rss&format=simple&link=link)

No comments