Recent Posts

Breaking News

Oplan Bulabog: Nanag-inom sa resto-bar sa uptown gibuyag, gipapauli


MGA kustomer nga nagtapok sa usa ka resto-bar nga nag-inom ug naglipaylipay sa Barangay Kasambagan, siyudad sa Sugbo ang nanguli nga nagkusmod ang mga simod human nga gipapauli sa mga pulis atol sa gilusad nga 'Oplan Bulabog' sa Cebu City Police Office (CCPO) niadtong Sabado sa gabii, Nobiyembre 14.

Gipangulohan ni Police Colonel Josefino Ligan, pangu sa CCPO, ang operasyon kuyog ang mga sakop sa Building Permit and Licensing Office (BPLO) ug Kasambagan Barangay Kapitan Franklin Ong.

Ilang gilibot ang mga imnanan nga sakop sa Mabolo Police Station. Kini nunot na sa mga reklamo nga nadawat sa kapulisan ug sa Barangay Kasambagan. Upat ang gidimalas human gibitbit sa mga pulis.

Kini human nga duha sa upat maoy mga nagduma sa mga imnanan nga wala mipatuo sa guidelines sa Inter-Agency Task Force (IATF) samtang usa niini walay pagtugot sa siyudad apan nag-operate gihapon.

Gipadayag ni Ong nga wala sila magkulang sa pagbadlong niining mga nagduma sa mga paimnanan. Apan mga gahi gihapon og ulo ug wala naminaw hinungdan nga nangayo kini og tabang sa awtoridad.

Samtang ang mga tindahan nga naaktohan sa mga pulis sa ilang paglibot nga wala motuman sa health protocol, naisyuhan og show cause order ug gimanduan nga tubagon sulod sa 72 oras. (BBT)


Source: Sun.Star Superbalita (https://www.sunstar.com.ph/article/1876981/Superbalita-Cebu/Balita/Oplan-Bulabog-Nanag-inom-sa-resto-bar-sa-uptown-gibuyag-gipapauli?ref=rss&format=simple&link=link)

No comments