Recent Posts

Breaking News

Motor nabangga sa Ceres bus; 2 angol


DUHA ka mga construction worker padulong motrabaho nangaangol human mabangga ang ilang gisakyang motorsiklo sa Lunes sa alas 5:05 sa buntag sa Ceres bus sa national highway sa Barangay Binungkalan, lungsod sa Catmon, amihanang Sugbo.

Mga biktima giila sa Catmon Police nga sila si Benjamin Molejon, 23, minyo, construction worker, taga Barangay Can-ibuang, Catmon ug silingan nga si Santiago Boter, 22, ulitawo.

Ang driver sa Ceres bus giilang si Andres Salumag, 33, minyo, taga San Jose, Toboso, Negros Occidental.

Si Salumag gibuhian sa Catmon police human siya ug ang mga pamilya nila ni Molejon ug Boter nagkasinabot sa pag-abaga sa galastuhan sa pagpatambal kanila.

Si Police Corporal Mendel Orevillo, sa Catmon Police Station nga nahinabi sa Superbalita Cebu, nagkanayon nga ang Ceres bus gikan sa dakbayan sa Sugbo paingon sa norte samtang sila si Molejon padung sab sa Dakbayan sa Lapu-Lapu diin sila nagtrabaho. Nagdali ang duha aron di manga-late.

Kalit nga ni-left turn ang bus aron mohunong sa bus stop.

Naatol usab sa pag-agi nila ni Molejon sakay sa ilang Yamaha Sniper nga naghaguros sa pagdagan hinungdan nga nagkabangga ang duha ka mga sakyanan.

Si Salumag nisulti sa kapulisan nga dihang siya nakakita sa motorsiklo, kalit siyang ni-brake sa tunga sa karsada.

Nangalabay ang duha ka mga biktima, apan si Molejon ra ang medyo grabe samtang si Boter nakagawas ra sa Catmon health center. (GPL)


Source: Sun.Star Superbalita (https://www.sunstar.com.ph/article/1876997/Superbalita-Cebu/Balita/Motor-nabangga-sa-Ceres-bus-2-angol?ref=rss&format=simple&link=link)

No comments