Recent Posts

Breaking News

Mga timbangan sa Mandaue public markets pangsusihon


KARON nga nagkaduol na ang Pasko, inspeksyunon sa lokal nga kagamhanan sa dakbayan sa Mandaue ang tanang timbangan sa Mandaue City Public Market aron malikayan ang pagpanglimbong.

Matod ni Atty John Eddu Ibañez, executive secretary ni Mandaue City Mayor Jonas Cortes, nga bisan pa man kaniadto kada semana nang i-monitor sa Public Market Authority ang mga timbangan sa tanang tindera sa Mandaue City Public Market.

Sa pag-inspeksyon sa Market Authority sa mga timbangan, tan-awon nila ang seal nga gibutang nila sa timbangan kon wala ba kini giguba aron i-adjust.

Matag timbangan sa merkado, adunay seal ang para adjust niini aron dili gyud mausab-usab ang timbang ug malikayan ang pagpanglimbong sa mga konsumidor.

Sigon ni Ibañez nga aduna sab gibutang nga “timbangang bayan” ang Market authority aron didto masuta sa mga konsumidor kon sakto ba ang timbang sa ilang mga gipamalit.

Ang maong “timbangang bayan” nahiluna sa tungang bahin sa mga stall sa mga namaligya og karne.

Giawhag ni Ibañez nga i-report dayon sa mga konsumidor ngadto sa Market Authority Office kon ang ilang mga gipamalit dili sakto sa timbang.

Kini aron matabangan sab nga ma-monitor sa market authority ang maong mga modus.

Sakmiton dayon sa Market Authority ang timbangan sa mga tindera nga mobaligya og dili sakto sa timbang.

Kinahanglan pa mobayad og P1,000 ang tindera aron makuha niya balik ang timbangan.

Kon buhaton gihapon kini sa maong tindera sa tulo ka higayon, dili ra ang timbangan niini ang sakmiton, apan lakip sab ang permit niini ug lisensya aron di na makabaligya sa merkado, sigon ni Ibañez.

“I-compare nimo, makailad kag gamay nya mawagtang imong panginabuhian,” dason ni Ibañez.

Sigon sab niya nga sa paghinabi niya sa Market Authority head nga si Edgar Seno nga wala pa silay nadawat nga taho nga misupak ang mga tindera sa merkado niini. (KFD)


Source: Sun.Star Superbalita (https://www.sunstar.com.ph/article/1876980/Superbalita-Cebu/Balita/Mga-timbangan-sa-Mandaue-public-markets-pangsusihon?ref=rss&format=simple&link=link)

No comments