Recent Posts

Breaking News

Magsuon nagkita human sa 20 ka tuig


PWERTENG hinangpanay sa managsuong Crisentia ug Teresita Villaflor kay human sa 20 ka tuig nga wa na magkita ug way komunikasyon, nagkahimamat na gyud sila.

Di matukib ang gibating kalipay sa magsuon dihang nagkita sila niadtong Miyerkules, Nobiyembre 11, human gihatod si Teresita sa Cebu City Anti-Mendicancy Office (CCAMO) nga ni-rescue kaniya gikan sa Carbon Public Market niadtong Nobiyembre 1, 2020.

Si Teresita usa sa mga street dweller nga naluwas sa Cebu City Hall human momando si Mayor Edgardo Labella sa pagluwas sa mga tawo nga naa lang namuyo sa aseras.

Siya gipapuyo sa temporary shelter sa Kagamhanan sa Siyudad.

Di lalim ang pagluwas kang Teresita tungod kay alsahon siya kay di na makalakaw.

Nasayran sa CCAMO nga siya taga lungsod sa Sogod, hinungdan nga gihatod siya sa tinguha nga mahibalik siya sa sabakan sa iyang pamilya.

Tuod man, pinaagi sa voter's registration, ilang nahibaw-an nga dunay igsuon si Teresita nga mao si Crisentia.

Sa ilang pag-abot, naghinangpanay ang magsuon nga sud sa duha ka mga dekada nga wa na magkita.

Matod ni Crisentia nga kaniadto gipalabi ni Teresita nga mopuyo sa Cebu City aron motrabaho isip tindera ug tighugas sa mga kan-anan sa Carbon public market.

Nipasalig si Crisentia nga iyang atimanon ang iyang igsuon taliwa sa gihambin niining sakit.

Iyang gipasalamatan ang Cebu City Government sa paghatod sa iyang igsuon aron mahaw-an na gikan sa kalisod sa pagpuyo sa aseras. (REV)


Source: Sun.Star Superbalita (https://www.sunstar.com.ph/article/1876592/Superbalita-Cebu/Balita/Magsuon-nagkita-human-sa-20-ka-tuig?ref=rss&format=simple&link=link)

No comments