Recent Posts

Breaking News

LTO mibukas sa regional office sa Ronda


Wa na kinahanglana pa sa mga Rondahanon ug kasikbit nga mga lungsod sa pagbiyaheg layo aron mo-transact sa Land Transportation Office (LTO).

Sa Miyerkules, Nobiyembre 18, 2020, gibuksang opisyal sa LTO ang ilang Ronda District Office alang sa mga lumolupyo sa southwest Cebu sa Lalawigan sa Sugbo.

Mao kini ang ika 15 nga district office sa LTO 7, diin dunay duha ka extension offices, upat ka licensing centers, tulo ka driver’s license renewal office, usa ka E-Patrol ug usa ka Malasakit Lounge.

Tungod kay naa pa sa modified general community quarantine (MGCQ) ang Sugbo, mga 80-100 lang una ka mga tawo ang matagad sa buhatan matag adlaw aron mapatuman ang social distancing, matod ni officer-in-charge (OIC) chief Mhike Jelord Rollo.

Sa iyang pagpamulong, si LTO 7 Regional Director Victor Emmanuel Caindec nipasalamat kang 7th district Rep. Peter John Calderon sa pagpangamahan sa Republic Act 11437 nga nagtukod sa district office sa lungsod sa Ronda.

Iyang gipasalamatan usab si Gobernador Gwendolyn Garcia, kinsa nitambong usab sa kalihukan, sa padayong suporta sa iyang buhatan.

Si Caindec nipasabot nga dihang gipagawas na ang pagtukod sa Ronda District Office ni LTO Chief Asst. Secretary Edgar Galvante, iyang gihagit si Ronda Mayor Terrence Blanco sa pagtukod sa estruktura alang sa buhatan.

Si Blanco, sa iyang bahin, niingon nga ang katukoran sa district office katumanan sa damgo sa mga Rondahanon.

Si Blanco nipasalamat kang Garcia sa pagtambong sa inugurasyon sa temporaryong buhatan nga naa sa Barangay Poblacion. Magtukod sila og edipisyo alang sa regional office.

Si Garcia nidayeg kang Caindec nga "man with the positive change in LTO 7" kay ang bag-ong building gitukod lang sa 20 ka mga adlaw nga nagmatuod nga ang pandemic di makapugong sa paglambo sa Lalawigan sa Sugbo.

"Busa sa paghimo niining LTO, 20 days, salamat kay wa gyud ninyo gigamit nga rason 'di mi uy kay Covid baya'," matod ni Garcia. (REV gikan sa PR)


Source: Sun.Star Superbalita (https://www.sunstar.com.ph/article/1877226/Superbalita-Cebu/Balita/LTO-mibukas-sa-regional-office-sa-Ronda?ref=rss&format=simple&link=link)

No comments