Recent Posts

Breaking News

Lapu-Lapu City College motanyag og dugang mga kurso


Makatanyag na og dugang mga kurso ang Lapu-Lapu City College sunod tuig tigtungha human kini giila sa Commission on Higher Education (CHED) nga higher education institutiion.

Si Mayor Junard “Ahong” Chan niingon nga kini nakab-ot human siya nipadala og suwat sa Ched.

“Buot pasabot niini, mas daghan pa tag mga courses nga pwedeng ma-offer ug mas daghan pa tang matabangan nga mamahimong scholars,” matod ni Chan sa iyang Facebook post.

Matod ni Chan nga sa miaging katuigan limitado ang mga kurso nga gitanyag sa ilang public college hinungdan nga ang ubang mga kabus nga tinun-an, bisan sa ilang kahimtang, mapugos sa pag-enroll sa pribadong mga tunghaan.

Si Chan nipasalig nga sa sunod tuig tigtungha, paninguhaon niyang madugangan ang mga kurso nga gitanyag.

Ang mao nga tunghaan nagtanyag og Bachelor of Elementary Education (BEED), Bachelor of Science in Secondary Education, Bachelor of Hospitality Management ug Bachelor of Science in Industrial Technology.

Niadtong Marso 24, 2010, gitukod ubos sa administrasyon ni kanhi mayor Arturo Radaza pinaagi sa usa ka ordinansa ug nagsugod sa iyang operasyon sa Hunyo 9, 2010 alang sa tuig tigtungha 2010-2011.

Dihang nagsugod sa iyang operasyon, duna kini consortium tali sa Cebu Normal University alang sa iyang mga kurso sa education ug sa Cebu Technological University (CTU) alang sa iyang technical programs. (REV)


Source: Sun.Star Superbalita (https://www.sunstar.com.ph/article/1876588/Superbalita-Cebu/Balita/Lapu-Lapu-City-College-motanyag-og-dugang-mga-kurso?ref=rss&format=simple&link=link)

No comments