Recent Posts

Breaking News

Lapu ABC office gi-lock; Chan: padlock me?


Nakurat si Lapu-Lapu Association of Barangay Council ABC President Eduardo Cuizon nga gi-padlock ang iyang buhatan ug sa secretariat office sa ABC Building sa wala masayri nga rason sugod niadtong Miyerkules, Nobiyembre 11.

Tungod niini, nabalda ang mga transaksiyon unta sa iyang buhatan sanglit dili naman makasulod ang iyang mga staff.

Usa ka staff ni Cuizon ang mipahibawo kaniya niadtong Nobiyembre 11 sa hapon gumikan kay aduna untay asikasohon sa ilang buhatan.

Dako ang pagtuo ni Cuizon nga dunay bulok politika ang pag-padlock sa iyang buhatan.

Ang pag-padlock naatol usab nga nabalik ang kuryente sa iyang buhatan nga sa iyang pasangil giputol sukad niadtong Oktubre 7.

Iya ra usab nga buhatan ug sa iyang secretariat ang gi-padlock ug wala giapil ang ubang buhatan sa ABC Building.

Ang tanang nag-opisina sa ABC building pulos dunay yawe sa main entrance.

Aron makasulod sa iyang buhatan lakip na ang iyang staff giguba ni Cuizon ang padlock sa iyang buhatan gamit ang cutter.

Iya kining gi-blotter ug nangayo ug sakop sa Lapu-Lapu City Police Office (LCPO) aron mosaksi sa pagguba sa padlock apan walay nipatim-aw.

“Nabalik ang kuryenti pag November 10, amo rasad opisina giputlan ang uban wala unya mo-connect man sila sa outlet para sa electric drill. Wa koy mahunahunaa except sa politika kay wa man koy kontra diri ani nga building,” matod ni Cuizon.

Si Cuizon naila nga kaalyado ni kanhi mayor ug karon Kongresista Paz Radaza.

Si Lapu-Lapu City Mayor Junard Chan nipadayag nga wala siyay kasayuran sa hitabo.

Gani siya nagduda nga drama ra kini ni Cuizon.

Iya usab giawhag si Cuizon nga mo-coordinate sa iyang buhatan kun adunay suliran sa kuryente sanglit ang kagamhanan ang nagbayad sa suga isip City Hall building.

“Mahug ‘padlock me’ na kay wala may naay lain yawe ngara, sila ra man. Kung iya nang giguba ang padlock, iya man sad nang katungod kay iyaha man nang opisina,” matod ni Chan.

“Gitumong gyud niya kada opening salvo sa nobenaryo sa Birhen sa Regla nagpa-presscon siya. Nagpapansin siya? Mao pud nay iyang gibuhat last year pud,” matod ni Chan.

Sa miaging tuig, wa mohimo og pagpangandam ang ABC sa flower decorations ug floral droppings nga maoy naandan matag bukas sa nobenariyo sa patron.

Atol sab sa ABC night giingong gisabotahe ni Cuizon ang kalihokan sa dihang way mga barangay opisyal nga nanunga.

“What a coincidence!” duda ni Chan.

Apan si Cuizon niingon nga wa siya namasangil ni bisan kinsa sa pag-padlock. / GCM, FVQ


Source: Sun.Star Superbalita (https://www.sunstar.com.ph/article/1876651/Superbalita-Cebu/Balita/Lapu-ABC-office-gi-lock-Chan-padlock-me?ref=rss&format=simple&link=link)

No comments