Recent Posts

Breaking News

Kumander sa NPA, 6 pa gigutom, mi-surender


DAKONG kawad-on sa grupong Front Committee 71 sa rebeldeng New People's Army (NPA) ang pagtahan sa ilang kumander ug lain pang unom ka kaubanan ngadto sa 73rd Infantry Battalion (IB) sa Philippine Army.

Gibutyag ni Lieutenant Colonel Ronaldo Valdez nga nitahan ang mga NPA sa ilang mga sakop ilawom sa Community Development Team sa kabukiran.

Matud ni Valdez nga sa pito ka mitahan, duha niini mga molupyo sa Purok Mamaon, Barangay Sibulan, Toril District, Davao City, tulo sa munisipyo sa Jose Abad Santos, Davao Occidental.

Samtang ang kumander mao sab ang political instructor sa grupo, nagpuyo sa Sarangani Province.

Apil sa gitahan sa grupo ang usa ka springfield rifle.

Gitataw sa mga kanhi rebelde nga gihimo nila ang pagtahan human nga nakaamgo nga wa silay maayong padulngan sulod sa kalihukan gawas sa kanunay makasinati og kagutom.

Si Valdez nag-ila sa pamuno sa grupo nga si Kumander Jary, kinsa nagbutyag nga nagkatibulaag na ang ilang grupo human nga daghan na sa ilang ginsakpan ang unang mitahan sa sabakan sa gobyerno.

Gilayong gisaad ni Valdez ngadto sa pito ka kanhi komunista nga tabangan silang makadawat og ayuda sa gobyerno pinaagi sa Enhanced Comprehensive Local Integration Program o E-Clip.

Gilantaw sa opisyal nga daghan pang NPA ang motahan karong mosunod nga mga adlaw gumikan sa gipakusgang operasyon sa militar sa kabukiran. (Orlando B. Dinoy)


Source: Sun.Star Superbalita (https://www.sunstar.com.ph/article/1876609/Superbalita-Davao/Balita/Kumander-sa-NPA-6-pa-gigutom-mi-surender?ref=rss&format=simple&link=link)

No comments