Recent Posts

Breaking News

Kaso sa Covid sa nasod mitabok sa 380K


DUL-AN sa 2,000 ka bag-ong mga kaso sa coronavirus disease (Covid-19) ang gitaho sa nasod sa Sabado, Oktubre 31.

Matod sa Department of Health (DOH) sa ilang case bulletin sa Sabado nga dunay 1,803 ka bag-ong mga kaso sa Covid-19 nga gitaho, nga nidala sa kinatibuk-ang gidaghanon sa kompirmadong mga kaso ngadto sa 380,729. Mga dapit nga dunay tag-as nga bag-ong mga kaso mao ang Rizal (97), Davao City, (93), Quezon City (86), Cavite (66), ug Pasig City (65).

Ang DOH nitaho usab og dugang 36 nga nangamatay, diin nidala sa gidaghanon sa nangamatay ngadto sa 7,221 sa alas 4 sa hapon sa Sabado.

Kini nagpasabot nga ang nasod duna nay fatality rate nga 1.90 porsyento, matod sa DOH.

Sa mga nangaulian gikan sa sakit, ang DOH nipahibawo nga niabot na kini og 331,046, diin dunay 606 nga bag-ong nangaulian.

Kini nagpasabot nga 87 porsyento sa mga tawo nga nangataptan sa novel coronavirus naulian na, dugang sa DOH.

Sa tibuok kalibutan, duna nay 44,888,869 ka kompirmadong mga kaso sa Covid-19 nga gitaho gikan sa labing minos 219 ka mga dapit sa kalibutan. (HDT, SunStar Philippines)


Source: Sun.Star Superbalita (https://www.sunstar.com.ph/article/1875341/Superbalita-Cebu/Balita/Kaso-sa-Covid-sa-nasod-mitabok-sa-380K?ref=rss&format=simple&link=link)

No comments