Recent Posts

Breaking News

IED mibusikad sa Maguindanao


GRUPO sa Bangsamoro Islamic Freedom Fighters (BIFF) ang gitudlo nga nagpabusikad sa bomba alas 4 sa hapon Sabado, Nobiyembre 21, 2020, sa probinsya sa Maguindanao.

Sumala kang Maguindanao Police Provincial Director Colonel Donald Madamba nga mibuto ang bomba duol sa waiting shed sa Barangay Timbangan, Shariff Aguak, Maguindanao.

Walay naangol sa pagbuto sa improvised explosive device (IED), apan nakamugna kini og sobrang kahadlok sa mga sibilyan.

Ang bomba gama sa 81-millimeter high-explosive projectile, mga ulo sa lansang, pulbura, blasting cap ug cellphone isip triggering mechanism.

Posibleng punting sa bomba ang panon sa mga sundalo nga magpatrolya sa maong dapit.

Daghan sab ang nagtuo nga posibleng pagpanghuraw kini sa mga miyembro sa BIFF gumikan sa sunod-sunod nga pagsurender sa ilang mga kaubanan.

Sa kasamtangan, ang kapulisan sa Shariff Aguak Maguindanao ug militar padayon nga nag-imbestiga kalabutan sa maong hitabo. (Edgar Fuerzas)


Source: Sun.Star Superbalita (https://www.sunstar.com.ph/article/1877669/Superbalita-Davao/Balita/IED-mibusikad-sa-Maguindanao?ref=rss&format=simple&link=link)

No comments