Recent Posts

Breaking News

Hijo Estate coastline nahimo na nga hingpit Marine Protected Area


ARON maprotektahan ug mapreserba ang abundang marine biodiversity sud sa ilang kabaybayonan, ang Hijo Resources Corporation (HRC) ug lokal nga panggamhanan (LGU) sa Tagum City, pinaagi sa ilang City Environment and Natural Resources Office (Cenro) nagpirma og memorandum of agreement (MOA) nga nagdeklara sa Hijo Estate coastline isip usa ka Marine Protected Area (MPA).

Ang Hijo Estate coastline, nahimutang sa Barangay Madaum, Tagum City, kabahin sa Davao Gulf.

Ang MOA, nga gipirmahan niadtong Oktubre 27, 2020, nagtimaan sa panag-ambit sa responsabilidad alang sa duha ka partido nga aktibong nagprotekta ug nagkonserba sa "marine life nesting" sa Hijo coastline. Ang pakigtambayayong naglambigit sab sa Department of Science and Technology (DOST).

Ang Hijo Estate coastline ug Davao Gulf isip kinatibuk-an mao ang puy-anan sa 10 sa 27 ka "whale species" sa Pilipinas. Usa sab kini ka importanteng "habitat" sa whale sharks ug dugongs, apil na ang "nesting sites" sa tulo ka mga turtle species nga naglakip sa talagsaong leatherback turtle, ug dunay taas nga "occurrence" sa plankton ug fish larvae nga importanteng mga elemento sa food chain. Kining tanan na-establisar, aron makonsidera ang lugar nga Marine Biodiversity Hotspot.

Ang bag-ong kasabutan nahisubay sa ilang panglantaw "to nurture nature today to benefit the generations of tomorrow."

Gipalig-on sa pagkomitar sa HRC ngadto sa kinaiyahan mao ang ilang sustainability arm - The Trinity Project. Pangulohan ni HRC Chief-Executive-Officer Rosanna Tuason Fores ug Director for Sustainability Harry Morris, ang proyekto nagtumong aron nga buhion ang corals, sea grass, ug bakawan sa Davao Gulf, nga makabenepisyo direkta ang mga komunidad sa palibot.

Sumala kang Morris, ila sab nga gitrabaho ang pag-ayo sa unang tulo ka importante nga marine elements sa Davao Gulf (corals, sea grass, mangroves), ug pauswagon ug protektahan ang "existing" nga marine life.

Usa sa mga pamaagi sa pag-ayo ug pagpalambo sa marine elements mao ang pagpakatag og artificial reef structures nga dunay nakataban nga coral fragments aron nga makadani og nagkadaiyang marine species nga kanhi abunda sa maong lugar. Gilusad sab ang pagpananum og sea grass sa ilawom sa kadagatan ug pagtanum sab sa mangrove sa kabaybayonan.

Sukad gisugdan niadtong 2015, nagkadaiyang matang sa isda nibalik, ug mga seagrass meadows nitubo ug nahimong luwas nga palibot alang sa dugongs.

Pinaagi sa ilang padayong paningkamot, ang The Trinity Project naglaum nga mabali ang di maayong epekto sa "erosion" nga kasamtangang nahitabo sa Hijo coastline tungod sa industrial pollution nga nahitabo mga dekada na kaniadto. Labing importante, naglaum sab ang The Trinity Projects nga matuman ang ilang panglantaw nga pagsustiner ug pagkonserba sa "incredible biodiversity" sa Davao Gulf alang sa sunod nga mga henerasyon aron nga malingaw. (Ace June Rell S. Perez uban sa PR)


Source: Sun.Star Superbalita (https://www.sunstar.com.ph/article/1877487/Superbalita-Davao/Balita/Hijo-Estate-coastline-nahimo-na-nga-hingpit-Marine-Protected-Area?ref=rss&format=simple&link=link)

No comments