Recent Posts

Breaking News

Gwen mogasto sa libro, di sa module sa DepEd


ANDAM nga mogasto ang Kagamhanan sa Lalawigan sa Sugbo aron sa pagsiguro nga may makat-unan samtang luwas nga nagtungha ang mga tinun-an sa K12.

Kini maoy gipahibawo ni Cebu Governor Gwendolyn Garcia subay sa giluwatan nga resolusyon sa League of the Municipalities of the Philippines (LMP) Cebu pagsuporta sa pag resume sa physical kun face-to-face classes sa lalawigan.

Atol sa pakighinabi sa mga tigbalita sa Nobyembre 17, gipasabot ni Garcia nga gikinahanglan na nga mohimo og lakang aron masalbar ang mga tinun-an sa nagkadaghan nga mga reklamo sa kasamtangan nga blended learning sama sa paggamit og modules, online class ug radio-based instruction.

“Yes, I think its about time because we are seeing that these modules are not working. Moreso, kaning online because the Province is not internet ready...we conducted a survey sa tibuok province, town by town. The best nga figure was only at 20 percent nga internet ready. So, of course nag modules ta, mahal kaayo sa tanan. Tagpila gud na ang usa ka module sa DepEd is estimating P280 per module. Unya upat ka modules in one month and we have over 600,000 students. Unya kamo, you are aware of that ana. Daghan kaayog sayop. Ang own nahimong ostrich,” matod ni Garcia.

Lain niyang gitumbok mao ang panginahanglan sa usa ka bata samtang nagtubo nga dunay ikahugoyhugoy nga laing bata. Gipasabot hinuon sa gobernador nga inanay, di diha ang pagpabalik sa klase nga maoy iyang tumong.

Sa wa pa moigo ang pandemya sa nasud, una na nga nipadayag si Garcia nga buot niya nga pinulungan sa English ang gamiton sa tanan nga mga libro o textbooks sa mga tinun-an.

Aron malikayan ang kalibog ug masiguro nga insakto ang makat-onan sa mga tinun-an, gilaraw usab ni Garcia nga mo hire og editors nga mosusi sa mga libro.

“I’m ready to set aside funding for that. But kaning mga module module? No. We did not set aside for that because we cannot be assured that we could really achieve the level of education that we would wish our children to have, ang standard of education has grossly been lowered with this module thing,” matod ni Garcia.

Dugang ni Garcia nga una nang mi propose ang Department of Education (DepEd) og pundo nga moabot P1.2 bilyones alang sa pag supply og modules sa mga tinun-an sulod sa 10 ka buwan.

Gawas sa mga libro, mo apud-apod usab ang kagamhanan ug libreng school supplies sama sa papel, notebook, lapis ug ballpen.

Pagsiguro nga luwas sa kagaw sa coronavirus disease (Covid-19)... "nag provide ta og UV lamps for all our schools. And we are ready to spend even more in the use of science and technology to assure a safer environment for our children in the schools,” matod ni Garcia.

Ang DepEd mipahibaw nga naghuwat na lang kini sa desisyon sa Presidente ug sa giya sa Inter Agency Task Force (IATF) subay sa resolusyon nga gi-duso ngadto sa task force.


Source: Sun.Star Superbalita (https://www.sunstar.com.ph/article/1877155/Superbalita-Cebu/Balita/Gwen-mogasto-sa-libro-di-sa-module-sa-DepEd?ref=rss&format=simple&link=link)

No comments