Recent Posts

Breaking News

‘Gitutokan’ nasuko, mipusil patay sa guard


IGO lang gyud nakahuman og kaon og duha ka mga balot ang usa ka 35 anyos nga gwardiya sa usa ka pribado nga tunghaan nga nahimutang sa Sityo Alumnos, Barangay Basak San Nicolas, Siyudad sa Sugbo dihang siya gipusil patay sa Biyernes sa gabii, Oktubre 30, 2020 sa tawo nga giingong iyang gitutokan.

Si Police Corporal Noel Timagos sa Mambaling Police Station sa Cebu City Police Office (CCPO) nga nahinabi sa Superbalita Cebu, niila sa biktima nga si Ernesto Gonzales, 35, stay-in nga gwardiya sa Rizwoods Tower, usa ka pribado nga tunghaan sa kolehiyo.

Napagan usab ang usa ka babaye nga naigo sa tiyan nga giilang si Marissa Echevarria, 50. Si Echevarria igo lang miagi sa nahitaboan dihang naigo sa saag nga bala.

Si Echevarria daling gidala sa tambalanan.

Ang suspek nailhan nga si Roniel Claro, residente sa Sityo Seaside, Barangay Basak San Nicolas.

Sa imbestigasyon sa Mambaling Police Station, si Gonzales nigawas sa iyang gibantayan nga tunghaan aron mokaon og balot nga pipila lang ka metro ang gilay-on sa iyang gipuy-an.

Wa pa masayri ang hinungdan, apan sa estorya sa mga tawo sa dapit, si Claro nasuko kang Gonzales kay wa nakauyon sa giingong pagtutok sa security guard kaniya.

Nagtuo si Claro nga suko og tinan-awan si Gonzales kaniya.

Gituohang niuli sa ilang balay si Claro aron pagkuha og armas dayon nibalik ug dihang nasugatan si Gonzales duol sa gate sa tunghaan, iya kining gipusil patay.

Si Gonzales namatay diha-diha human maigo sa ulo.

Daling nisibat si Claro ug dihang giadto sa kapulisan ang ilang balay, wa na didto ang suspek.

Si Regner Rivera, drayber sa tunghaan ug kauban ni Gonzales, niingon nga ang biktima maayong tawo ug way kontra. Naila kini nga komedyante.

Si Gonzales maayo og record kay lima ka tuig na kining gwardiya sa tunghaan. Lumad siya nga taga Barangay Maranding, lungsod sa Lala, Lanao del Norte.

“Nganong kana man intawon siya ang gitripingan nga maayong tawo man na? Gani, wala nay kaaway,” matod ni Rivera.

Dali siyang niadto sa dapit nga nahitaboan aron unta dad-on sa ospital ang higala, apan patay na sa iyang pag-abot.

Samtang si Timagos niigon nga sa iyang nasayran, si Claro nagumon sa illegal nga drugas sumala sa iyang giingong sulti sa pamilya niini. Ning pagsuwat, wa pa madakpi sa kapulisan si Claro. (BBT)


Source: Sun.Star Superbalita (https://www.sunstar.com.ph/article/1875342/Superbalita-Cebu/Balita/Gitutokan-nasuko-mipusil-patay-sa-guard?ref=rss&format=simple&link=link)

No comments