Recent Posts

Breaking News

Estriktong border ibalik


Ibalik sa Cebu City Government ang hugot nga pagbantay sa mga border o utlanan aron dili makasulod ang walay mga lehitimong tuyo sa Dakbayan sa Sugbo.

Kini ang gipadayag ni Mayor Edgardo Labella human nasuta sa Emergency Operation Center (EOC) nga 88% sa bag-ong pagtakod sa Covid-19 gikan sa mga transient o mga lumalabay nga tawo gikan sa lainlaing lugar.

“Kasagaran sad sa nakita nga positive, mga gikan sa lainlain lugar entering through the other ports of the island Province of Cebu,” matod ni Labella.

Gipahibawo usab ni Labella nga sa 28 nga napositibo sa Covid-19 niadtong Nobiyembre 11, ang duha niini nagpuyo sa Lapu-Lapu City ug dili taga Dakbayan sa Sugbo.

Kini human gilusad sa Emergency Operation Center ang dinalian nga contact tracing human sila naalarma sa kalit nga pagsaka sa gidaghanon sa nataptan sa virus niadtong higayona.

“We are seriously considering that, ato ning tan-awon karon. We will strengthen our capability and maybe we will re-enforce our border control because Cebu City is a peculiar place unlike other local governments nga usa ray ilang pier,” dugang ni Labella sa pag-istrikto og balik sa quarantine checkpoints.

Sa 26 nga napositibo sa Cebu City, siyam kanila mabdos o nanganak didto sa mga birthing center ug wala sa ospital kay lagi sila nahadlok nga matakdan sa Covid-19, matod ni Labella.

Kon magpadayon og saka ang kaso sa Covid sa siyudad, hayan mopatuman ang mayor og granular lockdown ug dili ang tibuok siyudad ang pugngan sa paggawas.

Ang Cebu City Police Officr (CCPO) milusad usab og Oplan Bulabog kinsa maoy mobadlong sa mga tawo nga magtapok diha sa mga commercial establishment ug uban pang dapit sa siyudad.

Kini aron maminosan o mawala ang mass gatherings nga maoy usa sa hinungdan sa pagtakod sa virus.

Si Police Colonel Josefino Ligan maoy mangulo sa maong Oplan diin angTask Force Kasaligan ug kapulisan manginspeksyon sa mga commercial establishment.


Source: Sun.Star Superbalita (https://www.sunstar.com.ph/article/1876827/Superbalita-Cebu/Balita/Estriktong-border-ibalik?ref=rss&format=simple&link=link)

No comments