Recent Posts

Breaking News

EO ni Labella giklaro


SA INANAY nga pagsaka sa kaso sa coronavirus disease (Covid-19), gipahugtan pagbalik ang pagsulod sa Dakbayan sa Sugbo.

Giklaro nga base sa Executive Order 105-A nga giluwatan ni Cebu City Mayor Edgardo Labella gipahibawo nga kadtong mga dili taga-lalawigan sa Sugbo nga buot mosulod sa dakbayan sa Sugbo kay adunay importanteng katuyoan gikinahanglan magdala og medical certificate nga negatibo sa Covid-19 sa niaging tulo ka adlaw.

Magdala sab og travel order gikan sa kompaniya nga gi-alagaran, travel itinerary sa Cebu City sud sa 10 ka adlaw, round trip ticket, confirmed booking sa hotel o pension houses ug company ID.

APOR

Samtang ang mga authorized person outside residence (Apor) sama sa government employees ug officials nga naggikan sa laing probinsiya nga mosulod sa Cebu City ang magdala sab og medical certificate kansang resulta negatibo sa Covid-19 sa milabayng pito ka adlaw, travel order/mission order nga gi-isyu sa ilang buhatan ug government ID.

Sa kadtong moduaw sa Cebu City gikan sa laing probinsiya kinahanglan nga mokuha og authority to travel (ATE) pinaagi sa online application nga: www.mics.cebucity.gov.ph/inboundapplication.

Gitataw nga way labot sa EO no. 105 ug 105-A kadtong nanukad sa local government unit sa Sugbo ingon man kadtong mga gipapauli nga Overseas Filipino Workers ug kadtong nanguli nga OFWs.

Company ID o certificate of employment ang bitbiton niadtong mga Apor ug mga private employees nga nagpuyo sa Sugbo nga maoy ipresentar sa mga pulis nga nagbantay sa border.

KALIBOG

Atol sa pag-post sa EO 105 ni Labella diha sa social media, nakamugna kini og kaguliyang sanglit nitumaw ang ilang kalibog kon apil ba ang mga molupyo sa gikan sa nagkadaiyang LGU bisan kon sakop ra sa Cebu province.

Apan nilurang ra ang mga pangutana sa online dihang nihatag og katin-awan ang Cebu City Public Information Office nga ang maong rekisito gitagana para sa mga bisita gikan sa mga probinsya gawas sa lalawigan sa Sugbo.

Ang border control gipahugtan ni Labella ubos sa pakigtambayayong sa PRO-7 pinangulohan ni Police Brigadier Albert Ferro ug sa Cebu City Police Office sa pagpangulo ni Police Colonel Josefino Ligan.

Wala gihapoy kausaban sa paghatod sa mga kargamento sanglit nalakip kini sa mga essentials ug magpadayon ang pagtamod sa pagbitbit sa mga dokumento nga gipatuman atol sa pagsugod sa pandemiya.

Mandatory gihapon ang pagpatuman sa minimum health protocol sama sa pagsul-ob og mask, face shield, social distancing ug ang curfew gikan 11:00 sa gabii hangtod sa 4:00 sa kadlawon samtang anaa pa sa modified general community quarantine.


Source: Sun.Star Superbalita (https://www.sunstar.com.ph/article/1877158/Superbalita-Cebu/Balita/EO-ni-Labella-giklaro?ref=rss&format=simple&link=link)

No comments