Recent Posts

Breaking News

Edlabs organizers, JS Footwear ikiha sa CCPO


CEBU City Police Office mopasaka nag kasong disobedience base sa Article 151 sa Revised Penal Code ug executive order ni Mayor Edgardo Labella sa Miyerkules, Nobiyembre 18, 2020 batok sa organizers sa Edlabs Riders nga nagtapok sa Plaza Independecia nga gipahigayon niadtong Nobiyembre 8, 2020.

Matod ni Police Lieutenant Colonel Wilbert Parilla, deputy city director for operations sa CCPO, nga wa mo-coordinate sa ilang buhatan ang maong grupo.

Apan iyang gi klaro nga bisan pa kon nananinghid ang maong grupo kanila, di gyud sila tugotan nga makahimog panagtapok tungod kay gidili pa ubos sa modified general community quarantine (MGCQ) protocol.

Ang Edlabs Riders grupo sa mga tigmotorsiklo nga mga supporter sa mayor.

Gikan sa Plaza Independencia, nag group ride usab sila sa nagkadaiyang mga dapit sa siyudad.

Lakip sa pasakaan og kaso ang JS Footwear sa Barangay Lahug nga gidagsa usab sa daghang mga tawo atol sa ilang gilusad nga grand sale sa opening salvo sa ilang tindahan.

Ang tindahan nibukas pinaagi sa grand sale niadtong Nobiyembre 11, apan mga usa ka oras kapin ang nilabay gipasirhan dayon sa Cebu City Hall tungod sa giingong mga kalapasan, labina sa health protocol.

Tungod sa hitabo, giimbestigar karon sa Siyudad ang mga opisyal sa Barangay Lahug nga nitugot sa sale nga way koordinasyon tali sa mga opisyal sa siyudad ug kapulisan. (AYB)


Source: Sun.Star Superbalita (https://www.sunstar.com.ph/article/1877104/Superbalita-Cebu/Balita/Edlabs-organizers-JS-Footwear-ikiha-sa-CCPO?ref=rss&format=simple&link=link)

No comments