Recent Posts

Breaking News

Dakong motorcycle dealer ikiha sa LTO 7


ANG Land Transportation Office ( LTO) sa Manila nihatag na og clearance kang Regional Director Victor Caindec pagpasaka og kasong tax evasion batok sa labing dako nga kompaniya sa dealer og motorsiklo sa Central Visayas (CV).

Kini ang gipahibawo ni Assistant Secretary Edgar Galvante sa Department of Transportation (DOTr) pinaagi sa usa ka suwat gipetsahan Oktubre 20, 2020 human ilang nadawat ang rekomendasyon uban sa mga dokumento isip ebidensya batok sa maong dealer gikan sa buhatan ni Caindec.

Si Galvante nitug-an nga ang LTO Central Office mohusay pa pinaagi sa administrative hearing para sa ilang pagahimuon nga evaluation pinasubay sa Section 2.7 sa Administrative Order AVT 2014-023.

Ang pangulo sa LTO-7 nitug-an sa Superbalita Cebu nga dugay na siyang andam ug ang hustong panahon ra ang iyang gipaabot.

“Aw, siyempre sugod nami og giyera ani. Dugay naman ang atong pusil og bala, wala lang nato gikablit. Dugay natang andam sa pagfile,” matod ni Caindec.

Matod niya nga giduso na sa iyang buhatan ngadto sa Bureau of Internal Revenue (BIR) ang balor duha ka tuig nga sales sa maong dealer og motor nga klaro nga iyang gihulagway nga adunay pagpamakak.

Matod ni Caindec nga iya nang i-refer sa mga legal expert ang mga dokumento nga ilang gihuptan para na sa pagduso criminal case batok sa usa ka dealer ug aduna pay laing upat nga iya na usab naduso sa LTO Central Office sa susamang kalapasan. (PAC)


Source: Sun.Star Superbalita (https://www.sunstar.com.ph/article/1877061/Superbalita-Cebu/Balita/Dakong-motorcycle-dealer-ikiha-sa-LTO-7?ref=rss&format=simple&link=link)

No comments