Recent Posts

Breaking News

Cebu City posibleng ma-ECQ og balik


Nabalaka ang deputy chief implementer sa Emergency Operations Center (EOC) sa Dakbayan sa Sugbo sa dagan sa coronavirus disease (Covid-19) transmission sa nakalabay nga pito ka mga adlaw sa Nobiyembre.

Si Cebu City Councilor Joel Garganera niingon nga kon magpadayon ang dagan karon sa mga pagpanakod, dako ang posibilidad nga mobalik ang Cebu City ngadto sa enhanced community quarantine (ECQ).

Iyang gikabalak-an mao ang dagan karon sa pito ka nakalabay nga mga adlaw diin mas daghan ang nangatakdan kay sa nangaulian kun recovery.

“Though the positivity rate is way below the WHO (World Health Organization) threshold which is five percent, but if people tend to be not mindful of the health protocol, we will be surprise that we will celebrate Christmas under ECQ,” pahimangno ni Garganera.

Iyang gibutyag nga dunay 13 ka tawo nga nangatakdan gikan sa 11 ka mga barangay.

Si Garganera nipasabot nga ang naghatag niini og kakuyaw mao nga katag ang mga tawo nga nangatakdan, pasabot nga lapad ang mga dapit diin kini nahitabo.

“Wala man hinuon silay common transmission but kani siya hilab ni siya,” matod ni Garganera sa interbyu sa Superbalita Cebu. Siya nipasabot nga mas sayon ang pagsubay sa transmission kon usa ra ka pamilya kay first generation ang dunay kahigayunang matakdan.

Nisamot ang kahadlok ni Garganera kay sa Nobiyembre 11, niabot og 28 ang nangatakdan sa SARS-CoV-2, kagaw nga nagdala sa Covid-19 nga nagagikan sa 10 ka mga barangay sa Dakbayan sa Sugbo.

“Basin sa di pa ron mahumang buwana, ma-lockdown ta,” pahimangno ni Garganera sa mga Sugboanon.

Masaligon siya nga sa di pa matapos ang Nobiyembre 12, mahuman na ang contact tracing sa mga close contact sa mao nga mga pasyente.

Sa data nga gihatag sa Department of Health (DOH) sa Central Visayas, sa Nobiyembre 6, ang Cebu City nitala og upat ka mga kaso sa Covid-19; 12 sa Nobiyembre 7; pito sa Nobiyembre 8; lima sa Nobiyembre 9; 13 sa Nobiyembre 10; ug 28 sa Nobiyembre 11.

Nabantayan usab sa EOC nga ang pagpanakod sa gawas nagkadaghan nga naa na karon sa 80 porsyento samtang sa panimalay naa lang sa 20 porsyento. / dugang taho ni JJL

Busa awhag ni Garganera sa mga Sugboanon nga motamod sa mga health protocol ug sundon ang tanang mga pahimangno sa kagamhanan. / dugang taho ni JJL


Source: Sun.Star Superbalita (https://www.sunstar.com.ph/article/1876639/Superbalita-Cebu/Balita/Cebu-City-posibleng-ma-ECQ-og-balik?ref=rss&format=simple&link=link)

No comments