Recent Posts

Breaking News

Babayeng napalgang patay sa Compostela hayan nalumos


Posibleng nalumos ang babaye nga nakaplagang patay mga alas 6 sa buntag sa Sabado, Nobiyembre 21, 2020 sa Cotcot River, Purok Ipil-ipil Brgy. Estaca, Compostela, amihanang Sugbo.

Mao kini ang gibutyag ni Police Captain Vincent Zozobrado, hepe sa Compostela Police Station sa Superbalita Cebu.

Si Zozobrado niila sa biktima nga si Rossel Antogop Estrada, 44, dalaga, taga Purok Ipil-Ipil, Barangay Estaca sa mao nga lungsod.

Matod ni Zozobrado nga Sabado sa buntag, nakadawat sila og taho sa usa ka concerned citizen nga dunay nakaplagang patay nga lawas sa usa ka babaye sa nahisgutang dapit.

Ningresponde ang iyang mga sakop nga sila si Police Staff Sergeant Fedilito Jopia, Police Staff Sergeant Daryl Rondina ug Patrolman Jhan Jacob Cavite.

Matod ni Zozobrado nga nagbuy-od ang lawas ni Estrada daplin sa sapa.

Sa paghiling ni Dr. Vincent Echen, patay na si Estrada, apan wa silay nakitang mga samad sa lawas nga timailhan sa foul play. Si Estrada giingong way maayong pangisip.

Mga tawo sa dapit niingon nga si Estrada, kinsa dugay nang libudsuroy sa dapit nakit-an sa mga alas 5:30 sa hapon sa Biyernes, Nobiyembre 20, nga nagsuroysuroy.

Matod ni Zozobrado nga nakit-an usab si Estrada nga nikanaug ngadto sa sapa nga lawom ug hayan sa kangitngit, nahulog ug nalumos.

Ang iyang lawas gidala na sa usa ka punerarya sa lungsod ug i-autopsy sa kapulisan. (GPL)


Source: Sun.Star Superbalita (https://www.sunstar.com.ph/article/1877596/Superbalita-Cebu/Balita/Babayeng-napalgang-patay-sa-Compostela-hayan-nalumos?ref=rss&format=simple&link=link)

No comments