Recent Posts

Breaking News

Ahong: border sa Lapu wa hugti


WALA mopahugot sa ilang border ang dakbayan sa Lapu-Lapu, apan duna lay random checks.

Kini ang giklaro ni Lapu-Lapu City Mayor Junard Chan nunot sa nasinating paghuot sa trapiko niadtong Nobiyembre 16 sa duha ka mga taytayan sa Mactan.

Gipasabot sa mayor nga ang gipahigayon lang sa mga awtoridad sa dakbayan mao ang random motor stop isip usab pagpangandam sa kapistahan sa dakbayan sa Nobyembre 20 ug 21.

Apan di usab kini ipahigayon sa duha ka taytayan alang sa mga sakyanan nga pasulod sa dakbayan aron masigurong flowing ang dagan sa trapiko.

Gawas sa random motor stop, hayan makapaabot usab ang publiko og mga pagsuroy-suroy sa kapulisan ug tanod sa kadalanan hilabi na sa mga suok-suok sa kabarangayan.

Kini aron pagsusi sa mga tawo nga magpundok-pundok ning nagsingabot nga pista.

Subling gipahimangno ni Chan nga ang pagtapok-tapok niining panahon sa pista gidili gayud aron kalikayan ang pagsaka sa kaso sa coronavirus disease (Covid-19). (GCM)


Source: Sun.Star Superbalita (https://www.sunstar.com.ph/article/1877300/Superbalita-Cebu/Balita/Ahong-border-sa-Lapu-wa-hugti?ref=rss&format=simple&link=link)

No comments