Recent Posts

Breaking News

15 ka pulis sa Tuburan gi-Covid


Halos katunga o 15 ka mga pulis sa lungsod sa Tuburan ang gipaubos sa isolation kini human nagpositibo sa coronavirus disease (Covid-19).

Si Police Colonel Aladdin Collado, direktor sa Cebu Province Police Office (CPPO), nagtuo nga nataptan kini atol sa ilang pag-duty sa sam-ang sa miaging Kalagkalag.

Matod ni Collado, nagpadayon lang gihapon ang gimbuhaton sa kapulisan apan sa kasamtangan ang mga pulis una nga gidugang sa Tuburan ang mohimo sa trabaho.

Matod ni Collado, walay kabag-ohan sa trabaho sa pulis sanglit nga duna may gipangbutang nga dugang pwersa ug posibleng dugangan pa ilabi na nga dako-dako usab ang lungsod.

Ang 15 ka mga pulis nga nagpositibo sa Covid-19 gibutang na sa isolation center kon diin sagad sa mga nagpositibo niini pulos mga asymptomatic.

Ang local health municipal office sa Tuburan nagpadayon na ang ilang pag-contact tracing ngadto sa na-close contact sa 15 ka pulis.

Gisaad sa hepe sa Police Regional Office (PRO) 7, Police Brigadier General Albert Ignatius Ferro, nga dili nila pasagdan ang 15 ka mga miyembro sa Tuburan Police Station nga nagpositibo sa Covid-19.

Gitahasan ni Ferro ang Regional Health Service 7 nga mosusi sa panglawas sa 15 ka pulis ug hatagan usab sila og mga vitamins aron molig-on ang ilang resistensya. / BBT, GPL, AYB


Source: Sun.Star Superbalita (https://www.sunstar.com.ph/article/1876824/Superbalita-Cebu/Balita/15-ka-pulis-sa-Tuburan-gi-Covid?ref=rss&format=simple&link=link)

No comments