Recent Posts

Breaking News

Way manok, no entry


GIREKOMENDAR sa Gamefowl Commission ngadto kang Mayor Edgardo Labella ang inanay nga pagbalik sa operasyon sa mga lisensiyadong buwangan sa Dakbayan sa Sugbo.

Kini subay sa resolution nga gipasar sa Cebu City Gamefowl Commission nga gipangulohan ni Konsehal Raymond Garcia sa Miyerkules, Oktubre 28, 2020.

Dunay mga lagda ug health protocol nga kinahanglang sundon ang mga sabongero sa ilang pagsulod sa buwangan.

Apil sa lagda mao nga way masyadahay, apan mahimong ipaagi sa sinyas ang pagpusta.

Usa sa mga buwangan di magpasulod kon way imbetasyon subay usab sa gimbut-an sa Inter-Agency Task Force (IATF) nga way live audience kun manan-aw sa sabong.

Kini nagkahulogan nga kadto lang dunay dala nga manok igtatari ang mahimong pasudlon.

Ang mga lisensyadong buwangan mahimong makapatari kada adlaw apan dili molapas sa alas 10 sa gabii ang mga sultada.

MASK GYUD

Sa rekomendasyon, ang tanang mga tawo sulod sa buwangan nga gitugotan hangtod 50 porsyento nga kapasidad kinahanglang magsul-ob og mask ug face shield

Ipatuman usab ang physical distancing, diin tulo ra ka mga tawo ang gitugotan nga makasulod sa ruwedahan.

Ipatuman usab ang temperature check ug kadtong adunay simtomas sa Covid-19,di pasudlon sa buwangan.

Ipatuman usab ang disinfection ug magbutang og alcohol o sabon ug tubig sulod sa buwangan, diin ang tiil ug ligid sa mga sakyanan kinahanglan usab i-sanitize.

Pabutangan og mga signage sulod sa buwangan unsaon sa paglikay sa Covid-19.

Gidili usab ang pagsiyagit sa ilang mga sugal ug ang e-wallet o cash less transaction maoy giengganyo sa commission.

“No live streaming devices shall be allowed inside the arena, in-person, audience, online o remote betting, and the live broadcasting/telecasting of cockfighting are prohibited,” dugang sa rekomendasyon.

Kini nga mga rekomendasyon nahasubay gihapon sa lagda sa IATF sa pagbalik sa sabong.

GIIMBITAR

Gidid-an pagsulod sa arena ang patron o manugalay nga wa giimbitar, ilista ang tanang nisulod sa buwangan, di makasulod ang mga 18-anyos paubos ug 65-pataas.

Gidasig ang paggamit og coupon inay kwarta ang ibayad ug pag-match sa manok wa nay taparay kay timbang na ang basehan.

Ang tag-iya sa Grand Tejero Arena nga maoy labing sikat nga buwangan sa Siyudad sa Sugbo nga si Nonoy Chongbian, niingon nga andam na ang ilang pasilidad bisan unsa nga matang sa guidelines nga ipatuman sa City Hall makabalik lang sila sa ilang operasyon.

Ang ilang arena adunay kapin sa 30 ka mga empleyado nga gisweldohan ug wa pay labot ang kapin 100 ka mga kristo, masyador ug mga vendor mga nagsalig sa arena sa ilang panginabuhian.

Laing akreditado nga buwangan anaa sa Pulangbato, Inayawan ug Duljo Fatima.

Si Garcia nagkanayon nga ang ilang gibuhat mao ang pagduso ngadto sa mayor ug depende na ni Labella sa pag-uyon sa ilang resolusyon.


Source: Sun.Star Superbalita (https://www.sunstar.com.ph/article/1875017/Superbalita-Cebu/Balita/Way-manok-no-entry?ref=rss&format=simple&link=link)

No comments