Recent Posts

Breaking News

Way makatinda sa publikong lugar sa Naga


WAY bisan usa nga gitugtang makapaninda sa Dakbayan sa Naga atol sa kasaulogan sa kapistahan niini sa Oktubre 10, 2020.

Matod sa lokal nga kagamhanan, kini pagtamod sa mga health protocol nga gipatuman sa kagamhanan, labina sa Lalawigan sa Sugbo aron mapugngan ang pagkatap sa coronavirus disease (Covid-19).

Ang siyudad magsaulog sa ilang tinuig nga pangilin sa Oktubre 10 pahinungod sa ilang patron, San Francisco de Assisi.

Gidid-an ang ambulant vendors, labina kadtong di mga taga Dakbayan sa Naga, sa pagpaninda sa daplin sa dalan, atubangan, kilid o luyo sa St. Francis of Assisi Parish church sugod sa Lunes, Oktubre 5 hangtod sa Oktubre 10.

Wa say gitugtang makapaninda sa plaza, boardwalk, baywalk o bisan asang publikong lugar.

“Ang liderato sa kagamhanan naghangyo sa publiko, ilabi na gyud sa mga manindahay og igong pagsabot niining maong lagda diin ang tumong mao man nga malikayan ang pagtapok-tapok sa mga publikong lugar ug ang pagkuyanap sa Covid-19 nga mikalas na og daghang kinabuhi tibuok kalibotan,” matod sa pamahayag sa lokal nga kagamhanan.

Gipahinumdoman usab ang katawhan sa kanunay nga pagsul-ob og mask, face shield ug pag-obserbar sa physical distancing, labina sa umaabot nga kapistahan.

“Ato kining sundon aron dili kita mapahamtangan og silot nga gilatid sa City Ordinance no. 2020-29 ug bag-ohay lang gi amendahan pinaagi sa Ordinance No. 2020-43 sa konseho sa dakbayan,” nagkanayon ang pamahayag. (REV)


Source: Sun.Star Superbalita (https://www.sunstar.com.ph/article/1872417/Superbalita-Cebu/Balita/Way-makatinda-sa-publikong-lugar-sa-Naga?ref=rss&format=simple&link=link)

No comments