Recent Posts

Breaking News

Videoke sa adlawan sa Mandaue gidili


GIDILI na sa Dakbayan sa Mandaue ang mga mag-videoke o karaoke gikan sa alas 7 sa buntag hangtod sa alas 5 sa hapon gikan sa Lunes hangtod Biyernes isip suporta sa distance learning sa mga estudyante.

Nipagawas si Mandaue City Mayor Jonas Cortes og executive order nga nagdili sa mga karaoke sa sulod sa modified general commnunity quarantine (MGCQ) period sugod sa Oktubre 15, 2020.

Ang kamandoan tubag sa rekomendasyon sa Philippine National Police, ubos sa pagpangu ni Police Director General Camilo Cascolan, nga ang tanang mga local government unit mopatuman og balaod sa pagdili sa kusog nga sound system o karaoke samtang nagsugod ang Department of Education (DepEd) sa ilang distance learning niadtong Oktubre 5., 2020.

Matod ni Atty. August Lizer Malate, nangulo sa Emergency Operations Center, nga nakadawat sila og mga reklamo sa mga estudyante ug mga trabahante kabahin sa mga mag-videoke sa ilang kasilinganan.

Gipasabot sa executive order nga di lang ang mga videoke o karaoke ang gidili, lakip na ang mga magpatukar og mga kanta nga molanog sa kasilinganan.

Sa oras sa kagabhion gikan sa tungang gabii hangtod sa buntag, matod ni Malate nga ipatuman usab ang noise ordinance sa Dakbayan sa Mandaue.

Ang bisan kinsa nga makalapas niini sa first offense, momulta og P1,000 o pagkabilanggo sa 10 adlaw, o pareho depende sa pagbuot sa korte. / KFD


Source: Sun.Star Superbalita (https://www.sunstar.com.ph/article/1873741/Superbalita-Cebu/Balita/Videoke-sa-adlawan-sa-Mandaue-gidili?ref=rss&format=simple&link=link)

No comments