Recent Posts

Breaking News

Unsay buhaton matag baha sa mga barangay sa Mandaue


GIKASABOTAN nila ni Mayor Jonas Cortes sa Dakbayan sa Mandaue ug sa mga kapitan sa barangay sa dakbayan nga maghimo og task force sa matag barangay ug mobile command center aron mahapsay ang koordinasyon sa pagdumala kon adunay baha.

Kini gikasabotan atol sa meeting nila ni Cortes kauban ang mga barangay kapitan, Housing and Urban Development Office, Disaster Risk Reduction Management Office, ug City Planning Office, niadtong Oktubre 15, 2020.

Matod ni Atty. August Lizer Malate, nangulo sa Emergency Operation Center (EOC) nga ang task force sa barangay langkuban sa mga kawani sa barangay ug City Disaster Risk Reduction Management Office (CDRRMO).

Gitahasan sila nga mag-focus sa pagmonitor sa mga lugar nga dali mabahaan, labi na kon adunay advisory sa bagyo o mga pag-ulan.

Gipahayag usab ni Malate nga naglaraw usab sila nga maghimo og mobile command center nga maghatag sa instructions sa tanang mga responders labi na sa balanse nga pag-deploy sa mga responders sa mga apektadong lugar.

Sa laing bahin, nagplano ang Dakbayan sa Mandaue nga makigsabot sa Department of Education (DepEd) nga mogamit una ang Dakbayan sa pampublikong mga tunghaan isip evacuation center kon adunay grabeng pagbaha.

Atol sa tigum, gimandoan usab ni Cortes ang City Planning and Development nga paspasan ang mga proyekto sa pagpugong sa baha sa syudad kauban ang Department of Public Works and Highways (DPWH).

Aron malikayan ang pag-backflow sa tubig sa sapa, kinahanglan kini butangan og dredging ug tiwason og tukod ang riprap sa mga sapa nga moagi sa dakbayan.

Subay niini, kinahanglan usab nga mag-clearing operation sa mga informal settler nga nagpuyo subay sa three-meter easement sa mga sapa apan, wa una kini gipadayon tungod sa pag-uswag sa Department of the Interior and Local Government sa maong kalihokan.

Gawas sa mga paningkamot sa gobyerno, sigon ni Malate nga kinahanglan usab nga motabang ang publiko labi na sa ilang solid waste management.

Matod ni Malate nga usa sab sa nakabara sa mga sapa mao ang mga basura nga gipanglabay sa sapa.

Giawhag niya ang publiko nga isip tabang sa gobyerno kinahanglan silang mosunod sa husto nga paglabay ug pag-segregate sa mga basura. (KFD)


Source: Sun.Star Superbalita (https://www.sunstar.com.ph/article/1873686/Superbalita-Cebu/Balita/Unsay-buhaton-matag-baha-sa-mga-barangay-sa-Mandaue?ref=rss&format=simple&link=link)

No comments