Recent Posts

Breaking News

Titser gipatay, gikawatan


KIDAPAWAN CITY -- Patay ang magtutudlo human gipusil alas 7:00 sa gabii, Dominggo, Oktubre 11.

Ang biktima mao si Ravin Lucero Bigcas, 30, minyo, senior high school teacher sa Salunayan National High School ug nagpuyo sa Barangay Agriculture, Midsayap, North Cotabato.

Sumala kang Midsayap Chief of Police Lieutenant Colonel John Moridel Calinga nga sakay ang biktima sa iyang gimaneho nga Honda Click 150 gikan sa iyang balay aron unta mopalit og Liquefied Petroleum Gas (LPG) sa kinapusoran sa lungsod.

Apan pag-abot ni Bigcas sa utlanan nga parte sa national highway sa mga barangay sa Central Glad, Lower Glad ug Agriculture, mibutho ang riding-in-tandem suspects ug gipusil siya og kalibre .45 nga pistola.

Daling gitabang ang biktima sa mga nakasaksi ug gihatud ngadto sa Dr. Ramon Pesante Memorial Hospital sa Midsayap apan gideklara siyang dead on arrival human makaangkon og unom ka mga samad pinusilan sa likod.

Ang mga suspek daling nisibat, tangag ang motorsiklo sa biktima.

Imbestigasyon sa kapulisan sa Midsayap Municipal Police Station bahin sa insidente nagpadayon. (Edgar E. Fuerzas)


Source: Sun.Star Superbalita (https://www.sunstar.com.ph/article/1873211/Superbalita-Davao/Balita/Titser-gipatay-gikawatan?ref=rss&format=simple&link=link)

No comments