Recent Posts

Breaking News

Tipik sa retaining wall sa Manipis road nahugno


MAAYONG pagkahugno sa yuta ug mga bato ug nagpasad sa karsada sa Sityo Telepono, Barangay Manipis, Dakbayan sa Talisay niadtong Miyerkules sa gabii, Oktubre 14, 2020.

Si Manipis Barangay Captain Joselito Laurente nibutyag nga mga alas 9 niadtong Miyerkules sa gabii, nahugno ang usa ka bahin sa retaining wall nga tipik sa road widening project nga gitrabaho sa QM Builders.

Nagtuo si Laurente nga sub-standard ang trabaho sa contractor tungod kay sa iyang nakita, gibutangan lang og mga bato samtang gamay ra usab ang semento.

“Grabe ka sub standard ilang trabaho. Gipangbutangan ra og mga bato. Gamay ra kaayo ang semento. Way klaro nga trabaho,” butyag ni Laurente.

Ang barangay Manipis usa sa mga bukirang dapit sa Talisay nga way puas ang landslide panahon sa ting-uwan.

Wa hinuoy naunsa atol sa hitabo kay way tawo o sakyanan nga miagi.

Siya nanghinaot nga matagad dayon kini tungod sa kabalaka nga kon magsige pa ang uwan, mas modaku ang kadaut.

Samtang sa habig sa QM Builders, si Willy Abatayo, supervisor sa kompaniya, nihimakak sa pamahayag ni Laurente nga sub-standard ang ilang trabaho.

Si Abatayo nipasabot nga wa pa nahuman ang ilang retaining wall tungod kay mag back fill pa sila sa luyong bahin niini.

Dugang pa niya nga baga nga puthaw ang ilang gibutang sa ilang proyekto aron pulido ang trabaho.

Ang mao nga karsada nga baktasanan kon mopaingon sa Dakbayan sa Toledo, gipasirhan na sa pipila ka mga higayon ni Mayor Gerald Anthony "Samsam" Gullas gikan sa mga runner ug biker tungod sa ginagmay nga mga landslide tungod sa uwan sukad pa niadtong Septiyembre.

Bisan ang Mines and Geosciences Bureau (MGB) 7 mipahimangno sa mga local government unit (LGU) nga magmatngon sa mga landslide panahon ning La NiƱa nga gipaabot nga mas grabe ang uwan kay sa naandan. (BBT)


Source: Sun.Star Superbalita (https://www.sunstar.com.ph/article/1873579/Superbalita-Cebu/Balita/Tipik-sa-retaining-wall-sa-Manipis-road-nahugno?ref=rss&format=simple&link=link)

No comments