Recent Posts

Breaking News

Talisay City mohatag ika-3 nga hugna sa hinabang alang sa senior citizens


ANG senior citizens sa dakbayan sa Talisay posible nga makadawat na sa ilang ikatulong hugna sa hinabang sa dili motapos ning buwana.

Si Talisay City Mayor Gerald Anthony Gullas Jr. nibutyag nga daghan ang nangutana kaniya kalabot na sa mga hinabang sa mga tiguwang hinungdan nga iyang gimando nga paspasan na ang pagproseso sa pundo.

Base sa nasabutan sa 22 ka mga kabarangay sila na ang mangita og paagi kon unsaon paghatag sa hinabang ngadto na sa mga tiguwang nga unang ipaimplimentar ug malikayan nga malapas ang mga guidelines sa Inter-Agency Task Force (IATF) sama sa pagtapoktapok.

Matud sa mayor nga mao kini ang ilang gihimong pamaagi nga sa ikaduhang hugna sa pagtamod sa mando sa IATF, hinungdan nga mao sab kini ang himuon niining ikatulong hugna sa paghatag sa ayuda.

“Once ma-release na ang assistance sa mga barangays, responsibilidad na sa mga barangay officials nga idistribute dayun ang cash assistance,” sigon ni Gullas.

Samtang, ang mga senior citizen kinsa benepesyaryo usab sa siyudad nga naapektahan sa lockdown sa laing lugar nga wala makadawat sa hinabang dili angay mabalaka o maguol tungod kay mahimo ra gyud nila kini nga madawat sa umaabot na nga adlaw.

Dugang ni Gullas nga kung dili man makahuman sa pagpanghatag sa dili pa matapos ang buwan, ipadayon kini sa buwan sa sunod buwan sa Nobiyembre aron mahatagan ang tanan. (BBT)


Source: Sun.Star Superbalita (https://www.sunstar.com.ph/article/1875112/Superbalita-Cebu/Balita/Talisay-City-mohatag-ika-3-nga-hugna-sa-hinabang-alang-sa-senior-citizens?ref=rss&format=simple&link=link)

No comments