Recent Posts

Breaking News

Shokoy gituohang hinungdan pagkalumos sa magsuon


BOSTON, Davao Oriental -- Gihaya na karon ang magsuong menor de edad human nangalumos atol sa ilang pagpangaligo og dagat alas 8 sa buntag niadtong Martes, Oktubre 6, didto sa Barangay Cabasagan sa naasoy nga lungsod.

Pipila ka mga mananagat ug residente sa dapit mitestimonya nga dunay "di ingon nato" nga gitawag nila'g "shokoy" ang ilang dapit.

Kini suma pa ang hinungdan nga daghan og isda sa maong kadagatan gumikan sa ilang giingong shokoy.

Kining tanan pulos tuo-tuo sa kinaraan, apan walay mawala kung tuohan ug di tuohan ang ilang testimonya.

Una niini, nahukman sa magsuon (mga pangalan gipatago sa pamilya) nga mangaligo og dagat, dihang natingala na lang iyang mga ginikanan nga dugay sila kabalik.

Gilayong gisubay sa ginikanan sa duha ka biktima ang baybayon ug sa unahan nakita nila nga nagkapa-kapa ang usa sa mga biktima.

Gidali nila'g salom apan pagkataudtaod, nangawala na sa ilang panan-aw ang mga biktima, hinungdan nga nagpatabang na lang sila sa mga rescuers.

Gilayong miabot ang mga rescuers gikan sa Boston Municipal Risk Reduction and Management Office ug nabangalan ang mga biktima apan wala na kini kinabuhi.

Nanggawas dayon ang mga istorya labot sa giingong shokoy sa kadagatan nga daan nang nakahibalo ang mga residente sa dapit.

Apan dunay pipila nga di motuo nga dunay shokoy ug nadisgrasya lamang ang duha ka biktima gumikan sa dagko nga balud nga dala sa hanging habagat.


Source: Sun.Star Superbalita (https://www.sunstar.com.ph/article/1872757/Superbalita-Davao/Balita/Shokoy-gituohang-hinungdan-pagkalumos-sa-magsuon?ref=rss&format=simple&link=link)

No comments