Recent Posts

Breaking News

Shabu lab sa Tagum natutyo


DAVAO DEL NORTE -- Laboratoryo sa shabu nadiskobre sa panday nga motanggal unta sa atop sa giabandona nga balay didto sa Purok Bagani, Barangay Cuambogan, siyudad sa Tagum alas 2:45 sa hapon, Dominggo, Oktubre 11, 2020.

Sa gihimong pakighinabi sa Superbalita Davao kagahapon kang Police Colonel Ranie Hachuela, director sa Davao Del Norte Police Provincial Office, gibutyag niini nga nadiskobre ang nahisgutang laboratoryo dihang ibaligya unta ang atop sa balay ni Marivic Wong Tan Casis.

Sumala pa nga miadto sa dapit ang kapuyo sa amahan ni Casis aron nga mahikay ang pagbaligya niini sa kantidad nga P1,500 aron ipalit og tambal sa amahan nga giingong dunay sakit.

Dugang nasayran nga ang panday mismo nga si Ronnel Natores Navarro, 38, kinsa gikuha aron nga motanggal sa atop nga ibaligya maoy nakadiskobre sa mga druga ug kagamitan nga gitagoan sa kisame nga bahin sa nahisgutang balay ug giingong gitaho gilayon ngadto sa mga awtoridad.

Ang maong balay nasayran nga kapin duha na ka tuig nga giabandona human madakpi si Casis niadtong Agosto 15, 2018 sa gilusad nga anti-drug operation nga giilang "shabu queen" ug naa na karon nakakulong sa Davao Penal Colony (Dapecol) sa nahisgutang probinsiya.

Gibutyag ni Hachuela nga balor og P23 milyones sa shabu ang nasakmit, apil na ang mga kagamitan sa paggama niini.

Human makadawat og impormasyon, giadtoan gilayon ang dapit sa hiniusang puwersa sa kapulisan nga gilangkuban sa Tagum City Police Station, Philippine Enforcement Agency, Provincial Intelligence Unit sa Davao del Norte Police Provincial Office ug uban pa.

Sumala pa nga una kining higayon nga dunay nadiskobre nga laboratoryo sa druga sa siyudad sa Tagum.


Source: Sun.Star Superbalita (https://www.sunstar.com.ph/article/1873213/Superbalita-Davao/Balita/Shabu-lab-sa-Tagum-natutyo?ref=rss&format=simple&link=link)

No comments