Recent Posts

Breaking News

Samboan misuspenso sa mga biyahe sa pier


GIPATUMAN sa kagamhanan sa lungsod sa Samboan ang indefinite suspension alang sa tanang biyahe sa ilang pantalan.

Kini subay sa bag-ong kamandoan, Executive Order (EO) No. 44, nga giluwatan ni Samboan Mayor Emerito Calderon.

Gawas lang sa mga pasahero nga gikonsiderar nga Authorized Persons Outside Residence (APORs) nga may importante nga byahe sama sa Medical Emergencies, Court hearings o ba kaha meeting ug kompirmadong flights.

Tuyo sa maong kamandoan mao ang pagpugong sa pagkatap sa coronavirus disease 2019 (Covid-19) sa ilang lungsod.

Una na nga gipahibalo ni Calderon nga wala pa silay nadawat nga abiso nga dawaton na sa probinsya sa isla sa Negros alang sa locally stranded individuals (LSI) nga mopauli sa tagsatagsa niini ka mga lugar ug aron kalikayan nga dunay ma-stranded sa mga pasahero sa pantalan, gipahunong una ang biyahe niini.

Hinuon, mipasalig ang Mayor nga buksan na niini ang pantalan basta masiguro nga dawaton na sa probinsya ang mga LSI.

Samtang, ang kagamhanan sa lungsod sa Aloguisan mihimo usab og lakang nga mapugngan ang pagkatap sa Covid-19.

Bisan ang mga pari nga mosalmot sa Pontifical mass atol sa kapistahan sa San Raphael Archangel sa Oktubre 23 hangtod sa Oktubre 24, kinahanglan nga mopresentar og medical certificate.

Kini subay sa kamandoan Executive Order (EO) No. 21 nga giluwatan ni Aloguinsan Mayor Cesare Ignatius Moreno.

Ang maong pamaagi gibuhat aron pagsiguro nga luwas sa sakit ang mga pari nga mopahigayon sa misa.

Gawas sa naasoyng lagda, gidid-an usab ang mga bisita pagsulod sa hurisdiksyon sa lungsod sa maong mga higayon.

Tungod niini, gimandoan sa Mayor ang awtoridad sa hugot nga pagbantay sa mga quarantine control points sa Barangay Bonbon, Kawasan ug Zaragosa.

Kini pag siguro nga ang mo sulod kadto lang mga indibidwal nga nalakip sa pagtugot sa mayor.

Sama sa mga LSI, Hhalth workers ug frontliners ingon man ang mga authorized persons outside residence (APORS).

Alang sa mga nagtungha o mga nagtrabaho sa lungsod, kinahanglan nga magdala kini og medical certificate ug ID aron mahatagan og visitors pass sa barangay.

Tungod sa padayon nga nasinating pandemiya, wala unay laing kalihukan gawas lang sa misa atol sa pista.

Sa maong mga higayon, dili pwede ang pag-videoke, pag inom, pag basketball, pag volleyball og uban pa nga kalihukan nga mo supak sa lagda sa Inter Agency Task Force (IATF).

Hinuon, alang sa mga buot mamaligya atol sa pista kinahanglan kini nga mokuha og vendors ID sa Municipal Health Office.

Subay sa datus sa lungsod sa Oktubre 20, usa na lang ka aktibong kaso sa Covid-19 ang gi-monitor sa lungsod ug ang 47 ka tawo ang naka-recover sa sakit. (ANV)


Source: Sun.Star Superbalita (https://www.sunstar.com.ph/article/1874220/Superbalita-Cebu/Balita/Samboan-misuspenso-sa-mga-biyahe-sa-pier?ref=rss&format=simple&link=link)

No comments