Recent Posts

Breaking News

Rep. Frasco: Baratong lungon alang sa kabus


ALANG sa mga kabus, ang pagpahiluna sa lawas sa sakop sa pamilya nga mitaliwan sa laing kinabuhi dakong problema tungod sa kadako sa galastohan labina sa lungon.

Kini ang naobserbahan ni Kongresista Vincente ‘Duke’ Frasco sa iyang paglibot sa iyang hurisdeksiyon sa sixto distrito sa amihanan sa lalawigan sa Sugbo.

Kadaghanan sa mga kabus moduol og mga politiko o mga opisyal sa lokal nga kagamhanan aron pagpatabang og palit og lungon. Tungod sa maong reyalidad, si Kong. Frasco nipasang-at sa Ubos Balay-Balauranan sa balaudnon nga nag-ulohan og Affordable Casket Bill, alang sa pagsiguro nga adunay dili mahal nga lungon ang ipamaligya sa mga punerarya.

“Dagko kaayo ang bayranan nga kasagaran paninglon sa mga punerarya. Ang mga yanong pamilya maglisud gyud sa pagbayad niini. Naguol pas kamatayon sa myembro sa pamilya, malisang pa sa kadaku sa utang alang sa paghaya ug paglubong,” matod ni Frasco, kinsa nagsilbi og tulo ka termino isip mayor sa lungsod sa Liloan sa wala pa mapili nga kongresista.

Kasagaran sa mga lungon karon mobalor gikan sa P5,000 ngadto na sa P300,000. Ang mga barato ug presyo dili sad kanunay available sa mga punerarya, kay pirmi walay stock ani nga mga klase sa lungon.

“Duna kunoy barato pero wala poy stock. Mao nga ang pamilya nga namatyan walay mahimo kung dili pagpili nalang sa kung unsay available, which is ang mga mahal na,” dugang ni Frasco. Kon mahimo nang balaud ang iyang gisang-at nga proposal, ang mga punerarya obligado nga magtener ug lungon nga makab-ot ang presyo.

Kung mga mahalon nalang ang anaa sa punerarya, obligado sila nga mopaubos sa presyo nga dili molapas sa P12,000 kung certified nga indigent ang pamilya sa nipanaw.

Kon ma aprubahan na kini, aduna usab atubangon nga penalty ang mga punerarya nga dili motuman niini, nga naglangkob sa multa nga P200,000 ngadto sa P400,000 o kaha pagka tangtang sa business permit ug uban pang lisensya. (PR)


Source: Sun.Star Superbalita (https://www.sunstar.com.ph/article/1872678/Superbalita-Cebu/Balita/Rep-Frasco-Baratong-lungon-alang-sa-kabus?ref=rss&format=simple&link=link)

No comments