Recent Posts

Breaking News

Radaza miawhag pagsuportahan sa produktong gama sa kababayen-an


GIAWHAG ni Lapu-Lapu City Congresswoman Paz Radaza ang Oponganon sa pagsuporta usab sa produktong lokal sa dakbayan nga gibaligya sa Kababayen-an sa Opon Nga Nagkahiusa Alang Sa Kalamboan (Konka).

Kini nunot sa pagbukas na usab sa turismo sa dakbayan.

Ang naasoyng organisasyon gitukod sa kongresista sukad pa niadtong wala pa siya mahimong mayor sa dakbayan diin gipaubos sa training ang kababayen-an matag barangay aron makat-on sa paghimo og nagkadaiyang produkto ug pagkaon nga ibaligya sa mga Oponganon.

Kini naglakip sa mga nagkadaiyang delicacies sa matag barangay ug potahe sa seafoods sa isla sa Olango.

Gani karong pandemiya motahi usab sila ug face mask.

Niadtong Oktubre 21, usa ka barrio fiesta nga kompetisyon ang gipahigayon sa Barangay Basak Gymnasium aron ibida ang mga produkto nga mahimong ibaligya sa Konka niining panahon sa pandemya.

Alang sa kongresista ang Konka maoy nagpakita nga pinaagi sa pag-umol ug usa ka organisasyon nga makamao mobuhat ug mga produkto aduna gayud silay panginabuhian kanunay bisan moabot ang pandemya.

“Mao gyud ni atong gi push gyud kay even though naa ra gihapon silay ginagmay nga gipanghimo like they cook sa mga company or mga seminar nga sila mo cater but hopefully with this pandemic ma patronize ang produkto sa atong grupo sa kababayen-an,” matod ni Radaza.

Si Mary Jane Calihog kinsa maoy presidente sa Konka mibutyag nga sa pagkakaron aduna na silay kapin sa 14,000 ka mga miyembro tibuok dakbayan.

Alang sa mga ganahan mo order ug nagkadaiyang delicacies mahimo ra nga mo order direkta sa matag barangay aron dili na mahasol ang kustomer.

Nakatigom na usab sila ug moabot sa P4 milyunes nga pundo diin mao usab kini ang ilang gipahuwaman sa mga myembro isip loan gumikan sa nasinating pandemya.

“Karong December nga nagsingabot na ready mi always sa mga order,” matod ni Calihog

Nahimong mananaog isip Best booth award mao ang Cluster 3 (Poblaciom, Gun-ob, Babag, Calawisan, Canjulao, Looc) ikaduha ang Cluster 1 (Pajo, Pusok, Ibo, Buaya, Mactan, Punta EngaƱo) ikatulo ang Cluster 2 (Basak, Bankal, Pajac, Maribago, Marigondon, Agus, Subabasbas) ug ikaupat ang Cluster 4 (isla sa Olango).

Samtang napili usab isip Media Special Award ang Espasol isip Best Kakanin ug ang Humba Curry ug Spicty Tuna empanada isip Best Dish. (GCM)


Source: Sun.Star Superbalita (https://www.sunstar.com.ph/article/1874221/Superbalita-Cebu/Balita/Radaza-miawhag-pagsuportahan-sa-produktong-gama-sa-kababayen-an?ref=rss&format=simple&link=link)

No comments