Recent Posts

Breaking News

Pulis: Katabang mura og ‘zombie’ sa iyang kaisog


GIHULAGWAY sa kapulisan nga nasusamag usa ka zombie ang katabang sa panimalay nga miataki dihang dakpon human nagmaoy sa kahubog ug naghasi sa Sitio Lobas, Baragnay Campusong, lungsod sa Borbon niadtong Sabado sa alas 4:00 sa hapon, Oktubre 24.

Si Nande Sumayang, 35, house helper ug nagpuyo sa nahisgutang lugar, kasamtangang gitanggong sa Borbon Police Station samtang gihikay ang mga kasong ipasaka batok kaniya karong adlawa.

Si Police Corporal Erwin Pepito, naangol human natuslokan ang iyang tuong mata ingon man gipaak ang tuong bukton.

Si Police Lt. Samuel Negro, hepe sa Borbon Police Station nga nahinabi sa Superbalita Cebu, nagkanayon nga ang suspetsado hubog nagmaoy dihang nag-inom og ilmnong makahubog diha sa ilang panimalay.

Ang mga silingan nangahadlok ug nanawag sa kapulisan kay nakasamok sa dapit, mangitag away ug mang-hambat sa moduol kaniya.

Tungod niini mirespondi sila si Police Corporal Erwin Pepito ug Police Corporal Israel Cometa.

Sa pag-abot nila, ilang naabtan ang mga barangay tanod nga mipakalma sa suspek.

Apan sa pagduol ni Police Corporal Pepito, iyang gikuptan ang suspetsado kalit lang nga gituslok iyang tuong mata, mikisikisi dayon gihambat, napaakan iyang tuong bukton.

Apan nakamaniho si Pepito nga dili na mapaakan og balik ug ilang napusasan ang suspek.

“Mura naman daw ni siyag “zombie” isog kaayo nagpangagot ang ngipon, manghambat siya mao nangahadlok ang mga tawo didto,” dugang ni Negro.

Matod ni Negro, nga dali niyang gidala sa tambalanan si Pepito, gipatambalan ang mata ug gipainjekan sa anti-titanus sa pagsiguro sa panglawas niini.

Gipadayag niini nga kanunay na niyang gipahimangnoan ang iyang mga sakop nga dili gyud mokompiyansa sa ilang pagrespondi sa mga alarma.

Una nagtuo lang sila nga usa ka tawo nga nalisoan sa pangisip ang nanghasi.

Apan mapasalamaton gihapon sila nga bisan sa ka kalit sa panghitabo wala magrabehi sa iyang sakop nga nitubag sa alarma.

Kasong alarmed and scandal, resisting arrest, ingon man kalapasan sa health protocol, ang ilang giandam batok sa suspek.

Ang mga residente sa dapit mibutyag sa kapulisan nga problema gyud nila ang suspek sa ilang lugar kay, gawas nga magmaoy kon mahubog, masusama og zombie kini ug manghambat sa nga tawo sa dapit hinungda nga nakuhaan ang ilang problema karon nasikop na ang suspek ug gitagong sa kapulisan sa lungsod. (GPL)


Source: Sun.Star Superbalita (https://www.sunstar.com.ph/article/1874669/Superbalita-Cebu/Balita/Pulis-Katabang-mura-og-zombie-sa-iyang-kaisog?ref=rss&format=simple&link=link)

No comments