Recent Posts

Breaking News

Pugante sa Mabolo Police Station mitahan


USA sa tulo nga ning-eskapo sa Mabolo Police Station nitahan tungod sa kahadlok nga mahisama sa iyang kauban nga napatay sa mga pulis nga ninggukod kanila.

Pasado alas 9 sa Martes sa buntag, Oktubre 27, 2020, nibalik sa Mabolo Police Station si Nico Baylosis uban sa iyang kapuyo nga taga Barangay Carreta, Siyudad sa Sugbo, human nieskapo sa selda niadtong Lunes sa tungang gabii, Oktubre 26.

Matod ni Baylosis nga human sila makapuga, didto siya sa balay sa iyang higala sa Carreta nagtago-tago, apan pipila ka oras ang nakalabay, nakahuna-huna siya nga mo-surrender sa kahadlok nga madisgrasya sama sa gidangatan sa ilang mayor-mayor nga si Roberto Ludong.

Iyang gipasabot nga bisan pa kon magpadayon siyang magtago-tago, mahimong madakpan ra gihapon siya ug mosamot pa ang iyang kaso.

“Para nako mo surrender gyud kay lisod kaayo, dili ko free. Og asa ko ganahan nga lugar moadto, magsige kog pang lingi kon asa ko mao nang ni boluntaryo nga mo surrender ko,” matod ni Baylosis.

Si Police Major Dindo Alaras, hepe sa Mabolo Police Station, una nang nakig-alayon sa kabanay ni Baylosis nga ipa-surrender aron way dautan nga mahitabo kaniya.

Dugang ni Alaras nga human sa pagpuga, way hunong ang iyang mga sakop sa pagpangita sa tulo lakip na kang Baylosis.

Ila nang gipang adto ang mga dapit nga posibling tagoan niini.

“Ni reach out ta sa iyang family nya ang iyang family ang nag convince niya,” matod ni Alaras.

GIUNSAG PUGA

Gitug-an ni Baylosis nga si Ludong ang naggabas sa rehas pinaagi sa pagbutang og tubig aron di madunggan sa mga pulis.

Nagsugod kini sa pag gabas niadtong Sabado sa tungang gabii ug nahuman pagka alas 4 na sa kaadlawon nianang Dominggo.

Wa dayon moiskapo ang tulo tungod kay naabtan silag buntag diin daghan na sa mga pulis naa sa gawas sa bilanggoan.

Gihuwat nila nga mamingaw ang palibot ug daghang giasikaso ang desk officer, matod ni Baylosis, ningpuga sila.

Sa dihang migawas na si Ludong ug si Oliver Basak misunod nalang usab siya bisan wala matod pa siyay plano nga mo puga.

Sa wala pa mogawas si Ludong, nanghulga pa kini sa iyang mga kaubang piniriso nga di magsaba sanglit siya ang mayor-mayor sa sulod.

“Siya may mayor-mayor namo diha mao nang ang uban mahadlok gyud niya. Kon unsay isulti ato niya diha sa sulod, motuo ang uban,” matod ni Baylosis.

Bisan sa pagka kuha pag balik sa mga miiskapo magpadayon ang imbestigasyon sa mga pulis nga duty niadtong higayuna.

Matod ni Police Colonel Josefino Ligan, hepe sa Cebu City Police Office (CCPO), nga wa siyay parelibuhan sa katungdanan sanglit daghan pa silag gimbuhaton ilabi na nga naa pa sa pandemic diin gikinahanglan ang mga pulis.

“Still ongoing ang investigation and as to their administrative liability, we will be determining because apparently there are mitigating circumstances. Because as I have said, all were immediately recaptured,” matod ni Ligan.

Gipa lig-on na usab ni Ligan ang mga rehas sa selda sa Mabolo pinaagi sa pagbutang og laing puthaw aron di na makaikyas ang mga binilango.


Source: Sun.Star Superbalita (https://www.sunstar.com.ph/article/1874910/Superbalita-Cebu/Balita/Pugante-sa-Mabolo-Police-Station-mitahan?ref=rss&format=simple&link=link)

No comments