Recent Posts

Breaking News

'Pansit' nangumbira, gipusil patay


WA MAGDAHOM ang usa ka lumolupyo sa Dakbayan sa Carar nga katapusan na niyang panihapon sa usa ka kombira siya gi-ambush alas 7:40 sa Dominggo sa gabii, Oktubre 4, 2020 sa Sitio Upper Tawog, Barangay Valladolid.

Si Jhunvey Idnele Pansit, 43, ulitawo, taga Sitio Garepa dead-on-arrival (DOA) sa tambalanan tungod sa mga samad pinusilan sa kalawasan.

Wa pay matumbok ang kapulisan sa dakbayan sa Carcar kon kinsa ang mamumuno.

Si Police Senior Master Sergeant Von Ian Tecson sa Carcar Police Station nga nahinabi sa Superbalita Cebu nagkanayon nga si Pansit gikan sa inom sa birthday party sa iyang silingan.

Dihang nahubog na pagkagabii, nag-inusara siyang nipauli nga naglakaw lang dihang nadunggan sa mga silingan ang mga buto sa armas.

Wa makabantay nga gi-atangan sa wala mailhing tawo ug gipusil makadaghang higayon.

Sa ilang pagsusi, ilang nakit-an si Pansit nga nag-ubo nga naligo sa dugo. Gidali siya sa pagdala sa mga silingan sa tambalanan sa dakbayan sa Carcar apan patay na kini.

“Wa may nakakita, Sir, kinsay nipusil. Pulos ambot ang mga tawo didto. Buto-buto raman gyud ilang nabati,” dugang ni Tecson.

Si Pansit gikatahong manuyupay og shabu kaniadto, apan niundang na.

Ang mga silingan nibutyag nga buotan si Pansit, way kaaway sa ilang dapit.

Wa isalikway sa kapulisan ang posibilidad nga dunay gikabangi si Pansit samtang nag-inom o kaha dunay karaang kaaway.

Nakuha sa kapulisan gikan sa crime scene ang usa ka kabhang sa bala sa 9mm pistol. (GPL)


Source: Sun.Star Superbalita (https://www.sunstar.com.ph/article/1872418/Superbalita-Cebu/Balita/Pansit-nangumbira-gipusil-patay?ref=rss&format=simple&link=link)

No comments