Recent Posts

Breaking News

Pamilyang Rodenas gustong masayod misukol ba o wa


GUSTONG masayod ang kabanay sa lider sa mga rebeldeng New People’s Army ang tinuod, nisukol o wala si Dennis Rodenas, 46, dihang gironda ang iyang gipuy-an sa Barangay Pung-ol Sibugay niadtong Oktubre 11 sa gabii.

Matod ni Maribeth Rodenas-Catalan nga gusto niyang mahinabi ang mga kauban sa iyang igsuon nga nadakpan, labina kang Jerlin Mercado, 41, kapuyo, kay sumala sa iyang nahibaw-an, wa mosukol si Dennis.

“Gusto lang namo, Sir, makaestorya ang mga nadakpan kay naa man gud to naestorya si Jerlin nga wala daw mosukol akong igsuon. Ako unta mahibaloan kon unsay nahitabo. Kay kon unta pwede man diay buhion ra, nganong napatay man?,” matod ni Catalan sa interbyu sa Superbalita Cebu.

Apan bisan pa niini, wa na nila gi-autopsy ang lawas sa iyang igsuon kay wa nay kapuslanan kay patay na man kini.

Tungod sa padayong hulga sa coronavirus disease (Covid-19), di nila madala sa Magpit, Cotabato ang lawas ni Dennis gawas kon kini i-cremate. Uyon sila nga kini i-cremate.

Sila si Maribeth ug iyang bana nga si Cris niabot dinhi sa Sugbo niadtong Huwebes, Oktubre 15, aron kuhaon ang lawas sa iyang maguwang ug dad-on sa Mindanao.

Matod niya nga nakugang sila nga nia diay dinhi sa Sugbo si Dennis kay nagkita pa sila niini niadtong Septiyembre aron pahibaw-on silang mga igsuon nga magpa-check up siya sa doctor.

Matod ni Maribeth nga naandan na sa iyang maguwang nga di magpahibawo kanila kon asa kini moadto ug nasayod sila nga usa kini ka sakop sa mga rebeldeng New People’s Army (NPA).

“Dili man gyud na sila magpahibalo sa amoa sir mao na nga wala mi kabalo kon asa na siya kay manawag raman na siya ug kalit sa amoa,” dugang ni Maribeth.

Samtang si Police Lieutenant Colonel Robert Lingbawan, hepe sa Regional Intelligence Division (RiD)-7 ningon nga ang PRO-7 ang mitabang sa pamilya ni Rodenas aron madali ang ilang pag ari sa Sugbo.

Kini aron maasikaso dayon ang lawas sa ilang igsuon bisan kon si Rodenas nakig-away sa kagamhanan. (BBT)


Source: Sun.Star Superbalita (https://www.sunstar.com.ph/article/1873815/Superbalita-Cebu/Balita/Pamilyang-Rodenas-gustong-masayod-misukol-ba-o-wa?ref=rss&format=simple&link=link)

No comments